Ranchi, Risaw:
Ka sorkar Jharkhand ha ka Lah Sngi U Blei ka la thungkam ïa kumba 827 ngut ki nonghikai ha ki skul Secondary ban pynbiang ïa ki jingdonkam jong ka jingduna nonghikai ha ka jylla.
Kane ka jylla ka la ïakynduh jingeh na ka jingduna palat jong ki nonghikai bad la sakhi ruh ba ki la don ki jingïakhih kiba la wanrah da ki khynnah skul bad ki kmie ki kpa jong ki halor ka jingduna jong ki nonghikai bad halor ka jingsakhi ba don tang iwei iwei i nonghikai ha ki skul ha kaba kane ka la long ka jingpynkheiñ ïa ka aiñ Right to Education Act.
Ka Development Economist ka Jean Dreze, ha ryngkat kiwei pat ki nongtrei mon sngewbha ban pynïoh ïa ka hok jong kiwei pat, ki la pynlong ïa ka jingleit jurip bniah sha ki skul ba la dei khmih da ka sorkar jylla ha kaba la ong ba na ki 35,438 tylli ki skul Primary, 6,904 tylli ki dei kiba don tang iwei iwei i nonghikai. Kane ka la pynshisha ba ki la don tang kumba 19.48 per cent ha kaba ka la long ka jingpynkheiñ ïa ka Right to Education Act.
Ha u bnai ba la lah ha Latehar distrik, ki kmie ki kpa lem bad ki khun ki la pynlong ïa ka jingïaid paidbah ha palat 1 kilometre bad buh jingthoh ban pynlong ïa ka jingïakhih ha Manika Block Development Office ban pyrshah jur halor ka jingduna palat jong ki nonghikai ha ki skul bad thoh ruh da ka shithi sha u Myntri Rangbah ka jylla u Hemant Soren ha kaba ïadei bad kane ka mat.
