Tel Aviv, Risaw:
Ka tnat shipai jong ka United States na ki thaiñ Middle East, ha ka Sngi Ba-ar ka la pynbna ba u khlieh duh lem bad ka kynhun jong u kin sa leit ban jurip sha Israel ban peit thuh bad ban lum jingtip halor ki jingdonkam ba kyrkieh jong ka Israel ha kum kane ka por ba ka dang iakhun ia ka thma pyrshah ia ki lehnoh Hamas jong ka ri Palestine.
La ong ba u heh shipai Michael “Erik” Kurilla, uba long u khlieh nongialam jong ka U.S. Central Command, u long uba hadien duh u ban leit jurip sha Israel hadien ka jingleit jurip jong ki heh ka US sha katei ka ri ha kine ki khyndiat sngi ba la leit.
Namar la ong ba ka tnat shipai jong ka US ka la maham pyrshah ruh ia kino- kino ki kynhun lehnoh bad ki ri Muslim kiba don jingiadei bad katei ka kynhun lehnoh Hamas, ba kim bit ban iasnoh kti lang ne ban ai jingkyrshan ia ki lehnoh Hamas hapdeng ka jingleit hiar thma jongki pyrshah ia ka Israel ha kane ka kynti. Namar lada kiwei ki ri kin leit iarap, kan wanrah ruh ia ka jingma kaba khraw bad kiba bun tylli ki ri kin sa kylla ia hiar thma kawei hadien kawei.
Namar kata, utei u heh u la ong ba ka Israel ka don ia ka hok ban iada ialade bad ia ki paidbah nongshong shnong jongka. Namar kumba la ju tip ruh ba baroh ki kam pyntriem bad ki kam thombor jong ki lehnoh ki long kiba be-aiñ bad dei na kane ka liang, ba ka Israel ka donkam ia ka jingkyrshan na kiwei pat ki ri namar ka don ha ka jaka kaba dei, katba katei ka kynhun lehnoh Hamas pat ka la leh ia kaba bakla tam bad ka hap ban mad ia ka jingshah rem bad ka dei ban shah pynduh bor noh ruh shi syndon namar ka jingleit thombor bad ka jingpyniap dusmon ia ki mynsiem ba lui-lui ha kane ka thma.
Watla katta, la ong ba ka United States ka la pynkhreh ia ki 2,000 tam ki shipai thma jongka ban phah sha Israel hapoh jong kine ki 24 kynta lada ka long kaba donkam. Kine ki shipai kin kynthup ruh ia kito ki shipai kiba dei ha ka kynhun ban leit rah bad pynpoi ia ki dawai bad kiwei- kiwei de ki jingdonkam kumba ju leh barabor.
Kumjuh ruh na ka liang jong ka Israel, ka la pynpaw ia ka jingbitar kaba jur pyrshah ia katei ka kynhun lehnoh Hamas jong ka ri Palestine. Kumta ruh ka Israel ka la smai ba kan pynhiar kput bad ba kan pynduh jait noh ruh ia kitei ki lehnoh Hamas ha kane ka kynti.
