Nongpoh, Risaw 17
Ka Lynti Jam Football Center Meghalaya kan pynlong biang ïa ka lympung ïalehkai ba la tip kum ka Sunfeast Cup 2023 ha ryngkat ka jingïatrei lang bad ka SPT Sports, Bangalore kaba long kum shi bynta ban kyntiew ïa ka jingïalehkai phutbol hapoh ka Jylla.
Haba kren sha ki nongthoh khubor ha ka sngi Ba-ar, u President katei ka synjuk, u Bah Sumarlang Swer u la ïathuh ba kane ka lympung kan dei na ka bynta ki khynnah shynrang kiba hapoh 13 snem ka rta, katba ïa ki kynthei pat kan long na ka bynta kiba hapoh ka 16 snem ka rta. Ïa kane ka lympung yn pynlong ha ka madan ïalehkai jong ka shnong Mawleiñ Mawkhan ha Ri Bhoi District naduh ka 26 tarik haduh ka 31 tarik mynta u bnai.
Halor kane ka bynta, u Bah Sumarlang u la wer ïa baroh ki klob, ki shnong, ki skul bapher bapher ki lah ban wan ïashim bynta lang ha katei ka lympung bad ka jingkhmih bniah ïa ka rta (screening) kan long ha ka 23 tarik mynta u bnai ha madan ïalehkai jong ka shnong Saiden kaba jngai tang kumba katto katne kilometre na Nongpoh. Ki nongïashim bynta ki hap ban wanrah ïa ki kot ki sla kiba donkam kum ka ID jong ka skul, Aadhar Card, ka Birth Certificate lem bad kiwei kiwei ki jingpynshisha.
Shuh shuh, u Bah Swer u la pyntip ruh ba lyngba kane ka lympung, ki khynnah ïalehkai kiba don sap kaba kham kynsai kin shah jied ban shah pyntbit sha ki jaka ai jinghikai phutbol (Football Academy) bapher bapher.
