Nongstoiñ, Risaw 18
Sa shisien pat ka New Nongstoiñ Sports Social & Cultural Club kan sa plie pyrda pat ïa ka lympung ïalehkai phutbol kaba heh duh ha ka sor Nongstoiñ ïa kaba la tip ruh kum ka Invitation Knockout Football Tournament 2023-24 ha Madan New Nongstoiñ.
Haba pyntip ïa kane, u President ka NNSSCC u Bah G.Syiemlieh u la ong ba ïa kane ka lympung yn plie pyrda ha 10 tarik u Naiwieng. Ha kane sngi sdang ka Ribhoi United FC kan ïakhun pyrshah ïa ka Jamshedpur FC ha ka por 1:30 mynsngi ha madan New Nongstoiñ.
U la ïathuh ruh ba ka khusnam baroh ha kane ka lympung kan long T.12 lak bad ki don kumba 16 tylli ki kynhun na kylleng ki jaka jong ka Jylla kumjuh nabar jong ka Jylla ki ban wan ïashim bynta.
Lah ban kdew hangne bad katkum ka prokram (fixture) ïa kaba la pyllait paidbah da ka NNSSCC la ïohi ba ki kynhun ki ban ïashim bynta ha kane ka lympung ki kynthup ïa ka Ribhoi United FC, Langsning Greenery Lion FC, 7 Wasa FC, Kith United FC, Nangkiew Irat FC, Nongbri Brother FC, Sikkim Boys FC, Blue Bombers FC, Jamshedpur FC, KMC FC Sonapur, MLP FT, United SC Kolkata, Shillong Lajong FC bad ka AFC Manipur.
