Shillong, Risaw 18
Ka sorkar jylla ha ka Sngi Balang ka la ai ka jing-mynjur ïa ka Draft jong ka Meghalaya Street Vendors (Protection of Livelihood and Regula-tion of Street Vending) Scheme, 2023 ha kaba la buh kyndon na ka bynta ki briew kiba shong die jingdie ha madan.
Ïa kane ka rai ban ai jingmynjur la shim ha ka jingïalang jong ka Kynhun Myntri bad ka jingthmu jong kane ka Scheme ka long ban pynbiang tarajur hapdeng ka jingdonkam ban ailad kamai jakpoh ïa ki nongshong die jingdie ha madan, ban pynthikna ïa ka jingshngaiñ ha ka leit ka wan jong ki paidbah, ban don ka shongsuk shongsaiñ bad kaba kham kongsan ban pyllait na ka jingkhapngiah.
Kane ka rai jong ka sorkar jylla ka dei kaba ïaid katkum ka Street Vendors (Protection of Livelihood and Regulation of Street Vending) Act, 2014, kaba la mynjur da ka Sorkar India ha u snem 2014, kaba la bthah ïa baroh ki jylla ba kin thaw ïa la ki jong ki kyndon khnang ban teh kyndon ïa ka jingshong dukan madan.
Haba kren sha ki lad pathai khubor halor ki bynta ba donkam jong katei ka Scheme, u Bah Paul Lyngdoh uba dei u Myntri sorkar bad ruh u nongaiktien ka sorkar u la pyntip ba ka sorkar kan peit thuh ïa ki nongdie madan kiba dei hok katkum ki kyndon ba la buh bad ban ailad ïa ki ban pynïaid shakhmat bad ka kam die jingdie ka jong ki.
U la ong, ka jingshim rai ka sorkar ka la wan ruh hadien ka jingjia pluh ding ha Thana Road, Khyndailad, ha kaba la kynnoh ba ki nongdie madan ki la long ka daw bah jong ka jingpoi slem jong ki kali pynlip ding.
U Bah Paul u la ong ba kane ka skhim kan kynthup ïa ka Town Vending Committee ka ban pynithuh pat ïa ki nongshong dukan madan ba shong aiñ bad ki kyndon ne ki kot ki sla ba ki nongdie madan ki dei ban don ki long ka EPIC, ka syrnod ban pynshisha ba la sah ym duna ïa ka 3 snem ha Meghalaya, ki dei ban long kiba la shong die madan haduh 6 bnai ha kajuh ka jaka, ban don ka laisen khaïi ha ki jaka kiba hap shabar ki lai tylli ki Normal Area kiba khmih da ka Shillong Municipal Board.
Shuh shuh u Bah Paul u la pyntip ba ïa kane ka scheme la pynbit pynbiang hadien ba la ïoh ki jingai jingmut na kiba bun ki nongïalam shnong, na ka KHADC, KSU, na ka seng ki nongdie madan bad kiwei.
“Ka lynti ba shakhmat ban shim pat mar-mar ka long ban sdang noh shwa ïa ka jingleit jurip ïa ki nongshong die madan bad ruh ban pynïaid shakhmat ka kam ba ïadei bad ki aplikeshon ne jingpynrung kyrteng jong ki nongdie madan katkum kitei ki kyndon ba la buh,” la ong u Bah Paul.
Nalor kane, u Bah Paul u la pyntip ruh ba ka tnat Pynroi Sor kan sa sdang ruh ha ka ban peit bad phiah ïa ki jaka hangno ba dei ban don ki jaka ban don ki nongdie madan bad hangno ban nym shah.
