Jowai, Risaw 18
Ka Shangpung Lumiawmuchai ka la khur ïa ka jingjop ha ka lympung ïalehkai Super Division Football Tour-nament (Kiang Nangbah Memorial Trophy 2023), katba ka Nangbah Ïawmusiang ka la jop ha ka 1st Division Football Tournament (Chatister Kharkongor Memorial Trophy 2023).
Ïa kine ki lympung la pynïaid da ka West Jaiñtia District Sports Association (WJDSA) ha ka sngi Balang ha Kiang Nangbah Stadium kaba ha Ladthadlaboh, Jowai.
Ha ka jingïakhun jong ka Super Division, ka Shangpung Lumiawmuchai ka la pynliem noh ïa ka Khimusniang da 3-2 kol.
Ha kane ka jingïakhun u Elizer Suiam u la ïoh ban thep ar kol na ka bynta ka Shangpung ha ka minit kaba 5 & 14, katba ïa kawei pat la pynbud da u Chillang Langstang ha ka minit kaba 13. Hynrei Khimusniang ka la lah ban pynphai kylla ar kol lyngba u Darimitre Syih ha ka minit kaba 50 & 87.
Ha ka jingïakhun 1st Division, ka Nangbah Iawmusiang ka la jop ïa ka Mookyndur da 2-0 kol. Ïa kine la thep da u Dawanbiang Passah ha ka minit kaba 79 bad u Mebanker Shalam ha ka minit kaba 83.
Ka jingïalehkai ha ka sngi Palei ha ka kyrdan ïakhun jong ka 1st Division kan long hapdeng ka Mukhla Evergreen pyrshah ïa ka Moosyiem Shangpung ha ka por 12 baje mynsngi, katba ha ka Super Division kan long hapdeng ka 7 Wasa United pyrshah ïa ka Mukhla Raij SC ha ka por 2 baje janmiet.
