United Nations, Risaw:
Ka tnat Human Rights jong ka United Nations ha ka Sngi Ba-ar ka la pynrem jur halor ka jingshah pynbthei bom ka hospital hapoh Gaza Strip bad ka la ong ruh ba ka jingleit pynbthei bom ia katei ka hospital hapoh Gaza ka long ka bym lah ban pdiang, watla ka lah ban long ka jingleh jong kano-kano ka ri na kano- kano ka kynhun ruh hynrei ka dei ban shah pynrem jur.
Da ki spah ngut ki briew, la ong ba ki la khlad ha katei ka jingshah thombor jong katei ka hospital Al Ahli Arab Hospital kaba don hapoh ka nongbah Gaza jong ka Palestine, ha kaba kitei kiba khlad ki kynthup naduh ki nongpang kiba thiah ha katei ka jaka sumar, ki nongtrei bad ki bahaiing- hasem jong kitei kiba pang bad kiba leit rung bad leit peit nongpang ha katei ka jaka sumar.
Ka tnat ka koit ka khiah jong ka Palestine hapoh Gaza, ka la iathuh ba ki liengsuiñ jong ka Israel ki la leit ban ther bom ia ka jaka sumar hapoh Gaza, ha kaba palat 200 ngut ki briew ki la khlad ha katei ka jingjia.
Katba ka tnat shipai jong ka Israel ka la kyntait bad kynnoh kylla ba dei u ‘namding jong ki lehnoh Islamic Jihad uba leit poi bakla sha katei ka jaka sumar ha katei ka sngi.
Kumta ruh katei ka tnat jong ka United Nations, ka la ong ba watla ka don ka thma ne ka jingiakynad ba kumno- kumno ruh hynrei ia ki hospital ym ju dei ban leit thombor ne ktah kti bad ki hospital ki dei ban ioh ka jingiada bad ki dei ban don ia ka jingshngaiñ, ym ban long ka jingma ia ki riew paidbah kumba long ha kane ka sien ba mynta.
Nalor ka jingbthei bom ha katei ka hospital, la ioh jingtip ruh ba 6 ngut ki briew ki la khlad noh hadien ba ki ‘namding ki la leit poi bakla sha kawei ka jaka pule ba la pyniaid da ka UN hapoh Gaza bad kaba la pynlong jaka sah shipor ia ki paidbah naduh ba khie ka thma. Ha katei ka skul ki don kumba 4,000 tam ki briew kiba leit sah bad rieh tngen shipor hadien ba ki la kylla phetwir bad ki la phet noh na ki shnong ba ki ju shong baroh shi katta shuwa ban khie ka thma ki lehnoh Hamas bad ka Israel.
Kumta, u heh ka United Nations ruh u la kyntu ia baroh ki liang bad baroh ki ri ba kin ym ialeh ban aiding ha katei ka jingiakhun thma jong ki lehnoh Hamas bad ka Israel namar ka long kaba ap jingma haduh katta ia ka lawei ka ban wan. Namar kata ruh u la ong ba baroh ki dei ban thaw lad- thaw lynti bad ban wad lad kumno ban pynkut noh ia katei ka thma ha ka por kaba biang.
Ha kajuh ruh ka por ka United Nations ka la kyntu ia ki bor pyniaid ba ki dei ban pynbiang ka jingiada naka bynta ki riew paidbah bad ki paidbah ba lui-lui kim dei ban shah ktah ne ban shu duh ei ia ka jingim watla ka thma hapdeng ka Israel bad ki lehnoh Hamas ka dang iai bteng. Kumjuh ruh ki tnat bad ki ri bapher ki dei ban ialeh ban phah ia ki jingiarap sha Gaza naka bynta ki paidbah nongshong shnong ka Gaza namar ki paidbah ki don ka hok ban im bad ki dei ban ioh ka bam- ka dih kumba long lem kiwei kiwei.
Namar la ong ba na ka liang jong ka Israel ruh, ka la ther bom bad ther ‘namding khlem sangeh sha baroh ki bynta ba don ki ktem lehnoh Hamas ha kylleng jong ka Gaza naduh ba ki lehnoh Hamas ki la leit hiar thma ia ka Israel ha ka 7 tarik jong une u Risaw, ha kaba palat 3,000 ngut ki briew ki la khlad noh na ka jingleit ther kylliang jong ka Israel hapoh Gaza Strip.
Kumjuh ruh sha ka liang ka Israel, kumba 1,400 tam ki briew ki la shu iap ei ha ka jingleit thombor jong ki lehnoh Hamas naduh kaba sdang jong ka thma.
