Shillong, Risaw 18
Ka jingïaid lynti ka Assam Rifle Public School (ARPS) ha ka lympung ïalehkai 62nd Interna-tional Subroto Cup Football Tournament 2023 ka la poi sha kaba kut hadien ba ïakhaid mar 1-1 kol pyrshah ïa ka Sanjeevan Vidhyaniketan & Chha-trapati Shivaji Kanishta Mahavidyalaya kaba na Maharashtra ha ka sngi Balang ha nongbah Delhi.
Kane ka kynhun ïalehkai U-17 ka Jylla hapoh ka jingïalam u Bah Badamut Riahtam (coach) ka la lah ban khur jingjop lai sien kata ïa ka St. Francis Xavier High School (DD & DNH) da 14-0 kol, kumjuh ïa ka Navy Children School kaba na Mumbai da 9-0 kol bad ïa ka Khajaman H.S.S, Trichy na Tamil Nadu da 1-0 kol, hynrei ka la ïakhaid mar shi kol bad katei ka kynhun kaba na Maharashtra.
Wat la ka Assam Rifle bad ka Sanjeevan ki la kamai mar 10 point na ki saw sien ïakhun, hynrei katei ka kynhun na Maharashtra ka la wan ha ka kyrdan ba hakhlieh na ka Pool-D bad ban ïoh rung sha ka quarter final, katba ka Meghalaya ka la hap ban wanphai ïing noh.
Kum ban shu pynkynmaw ka Jylla ka la phah lai tylli ki kynhun sha katei ka lympung ha la ki jong ki kyrdan, hynrei ka Saiden Secondary School (U-17 girls) lem bad ka H.K. Sing SS (U-14 boys) ki la shah rem noh ha ka quarter final.
