UK, Risaw:
Katkum ki khubor la ong ba katba ka ‘erlangthari ‘Babet’ ka dang ap ban leit iaid lynti bad leit poi sha UK ha kine ki khyndiat sngi ki ban wan, ka United Kingdom pat ka la pynkhreh lypa ia ki lad jingiada bad ka la maham ruh ia ki paidbah khamtam ha ki bynta Shathie-mihngi jong ka Renfrewshire, Scotland bad kumjuh ruh naduh Cambridge ter-ter.
Ka ‘Babet’ ka dei ka kyrteng ba la ai da ka Met Office jong ka United Kingdom ha kaba la ong ba kitei ki bynta kin ioh mad ia u slap bad ka suiñ bneng kaba sniew tat haduh ka Sngi Saitjaiñ jong kane ka taiew baroh shi taiew. Kane ka ‘erlangthari ka dei kaba ar hadien jong ka ‘Agnes’ kaba la wan lynshop ia ka Britain ha une u Nailur ba la leit.
