Khliehriat, Risaw 18
Ka Khliehriat West FC ka la long ka kynhun kaba lai ban jam sha ka semi final jong ka lympung ïalehkai 1st Division Football Tournament ba la pynïaid da ka East Jaiñtia Hills District Football Association (EJHDFA).
Kane ka la wan hadien ba ka Khliehriat West ka la pynliem noh ïa ka Rangad SC lyngba ka tie-breaker da 5-4 kol ha ka jingïakhun quarter final kaba la long ha madan Artificial Turf Diengshynrum, Khliehriat ha ka sngi Balang.
Ha ka jingïalehkai katkum ka por ba la buh ka la kut noh ha ka jingïakhaid kaba mar 1-1 kol. Ïa ka kol jong ka Khliehriat West la thep da u Jasmine Tlang tang ha ka minit kaba 6, hyneri ka Rangad ka la lah ban pynïakhaid kylla ha ka 8 minit da u Hermon Dkhar.
Hadien ba kine ki arliang kim shym la lah shuh ban ïathep kol haduh kaba kut ka jingïalehkai, na ka liang ki bor pynïaid ki la pynïashut noh da ka tie-breaker ha kaba ka Khliehriat West ka la tam da 5-4 kol ïa ka liang pyrshah na ka bynta ban khur ïa ka jingjop.
Ka jingïakhun quarter final kaba khatduh ka ban long ha ka sngi Palei hapdeng ka Byndihati SC pyrshah ïa ka Tpepswer SSWO ha ka por 2 baje noh phai sngi.
