Shillong, Risaw 18
Ka Lawmali Pyllun SC ka la khur ïa ka jingjop kaba ar ha ka lympung ïalehkai SSA SRGT 3rd Division Football League 2023, hadien ba ka la pynliem noh ïa ka Rynjah SC da 3-2 kol ha ka sngi Balang ha SSA Stadium, Polo.
Ha kane ka jingïakhun jong ka Group-D, ka Lawmali Pyllun ka la ïakhun tyngeh naduh kaba sdang ha kaba ka la ïoh ban pynkhih jar nyngkong eh lyngba u Lahnambhah Manner ha ka minit kaba 25. Hadien shiteng kynta kane ka kynhun ka la pynbud ïa ka kol kaba ar lyngba u Nathaniel Kharbuli (37). Ïa ka kol kaba lai la thep hashwa ban kut jong ka kylla step lyngba u Banganson Nongphlang (44).
Hynrei hadien katto katne por ba la bteng biang ïa ka jingïakhun jong ka kylla miet, ka Rynjah ka la lah ban pynphai kylla ar kol lyngba u Banshailang khriem (73) bad u Hasken Roy Kharsati (78) hashwa ba kan mad ïa ka jingshah rem.
Haba phai sha kawei pat ka jingïakhun jong kane ka group, ka Nongumlong SC bad ka Lumdiengjri SC ki la ïasam mar shi point hadien ba ki la ïakhaid mar 2-2 kol.
Na ka Lumdiengjri la thep da u Gabriel Blah ha ka minit kaba 26 bad u Borsing Langñuih (69), katba ka Nongumlong ka la pynïakhaid kylla lyngba u Donbor N. Shanpru (38) bad u Nehlang Kharsah-noh (66).
Te kumta ka Lawmali Pyllun ka dangïai bat ïa ka kyrdan ba-ar, hynrei ka la ïaryngkat mar kamai 7 point bad ka Tynring, kaba don ha ka kyrdan ba hakhlieh. Hadien pat la bud sa ka Lumdiengjri (4 point), Rynjah (3 point) bad ka Nongumlong (1 point).
Haba phai sha kawei pat ka jingïakhun jong ka Group-A, ka Gorkha Association ka la wanphai da ka jingjop kaba nyngkong hadien ba ka la pynliem noh ïa ka Lapalang SC da 2-1 kol.
Kane ka la wan lyngba u Gabriel Iacias uba la thep thep ar kol ha ka minit kaba 14 & 66, katba na ka Lapalang la pynphai shi kol da u Ryntih Marap (80) hashwa ba kan mad ïa ka jingshah rem.
Kane ka lympung kan bteng biang ha ka sngi Palei, ha kaba ka MLP F.T kan ïakhun pyrshah ïa ka Krang SC (11AM), ka Nongmynsong SC ïa ka Umlyngka SC (1PM) bad ka Nongkseh SC ïa ka Pomlakrai SC (3PM).
