Paris, Risaw:
Ki bor pyniaid jong ka France ha ka Sngi Ba-ar, ki la iathuh ba u runar uba pyniap ia u nonghikai skul hapoh France ha ka taiew ba la dep, u dei uba don jingiadei bad ka kynhun lehnoh Islamic State (IS). Kane ka wan hadien ba lap ia ka jingiakren jong u bad ki nongialam jong katei ka kynhun lehnoh ha kaba u la kular ban leit leh ia katei ka kam runar bad kam thombor ha katei ka skul.
Katei ka jingpyniap ha ka Sngi Thohdieng, ka long ruh ha kajuh ka por ba ki lehnoh Hamas ki la leit thombor ia ka Israel ha kane ka sien. La ong ruh ba katei ka jingshah pyniap jong utei u nonghikai hapoh France, ka la pynkhih win bad wanrah jingsyier ia ki paidbah katei ka ri ha kum kane ka por ba ki kam thombor jong ki lehnoh ki la sdang ïeng rasong.
Utei suba don kti u dei ba la tip kyrteng kum u Mohammed Moguchkov bad u dang don 20 snem ka rta. U dei na ki thaiñ ba bun ki jaitbynriew Muslim ha Russia bad u la shah pynngat noh hapoh ki kyndon pynkheiñ aiñ kiba iadei bad ki kam thombor jong ki lehnoh.
