Jowai, Risaw 19
Ka 7 Wasa United bad ka Mukhla Raij ki la ïasam mar shi dor-thong (point) ha ka jingïakhun jong ka Super Division Football Tournament (U Kiang Nangbah Memorial Trophy), katba ka Evergreen Mukhla ka la khur jingjop ha ka 1st Division Football Tournament (Chatister Kharkongor Memorial Trophy 2023) ba la pynïaid da ka West Jaiñtia District Sports Association (WJDSA).
Ha ka jingïakhun jong ka 1st Division kaba la long ha Kiang Nangbah Stadium ha ka sngi Palei, ka Evergreen Mukhla ka la pynliem noh ïa ka Moosyiem Shangpung da 5-1.
U Nidaïoh-I-Dhar u la khyrwit da ka hat-trick hadien ba u la ïoh ban thep ha ka minit kaba 8, 20 & 65, katba ïa kiwei pat la thep da u Pynioladmiki Ryngkhlem (9) bad u Dauni Suna (76). Ïa ka shi kol jong ka Moosyiem Shangpung la thep da u Kenny Langbang ha ka minit kaba 43 hashwa ban kan mad ïa ka jingshah rem.
Haba phai sha ka jingïakhun jong ka Super Division, ka 7 Wasa United bad ka Mukhla Raij ki la ïakhaid mar 1-1 kol. Tang mar ïasdang ka jingïakhun ka Mukhla Raij ka al pynkhih jar nyngkong eh lyngba u Timmy Ryngkhlem ha ka minit kaba 9, hynrei 7 Wasa United ka la pynïakhaid kylla lyngba u Pynshai Lathong ha ka minit kaba 23.
Ha ka sngi Thohdieng ka jingïalehkai ha ka 1st Division kan long hapdeng ka Sohmynting pyrshah ïa ka Wahïajer ha ka por 12 baje mynsngi, katba ha ka Super Division kan jingïakhun kan long hapdeng ka Sailung Ïalong pyrshah ïa ka Ladthadlaboh ha ka por 2 baje nohphai sngi.
