Shillong, Risaw 19
Saw ngut ki nongïalehkai athletics ka Jylla ki la lah ban khur takma ha ka 34th East Zone Junior Athletics Championship 2023 kaba la long ha Kolkata.
Kine ki kynthup ïa ka takma rupa ba la khur da ka Rukini R.T Dkhar ha ka jingïakop mareh 600M jong ka kyrdan ïalehkai Under-14 ha kaba ka la lah ban thaw ïa ka rekod kaba thymmai da kaba pyndep ha ki 1:42.80 sekhon lem bad ka Sibilda Maring, kaba la lah ban thaw ïa ka rekod kaba thymmai da kaba kynthih ha ki 1.45M ha ka High Jump jong ka kyrdan ïalehkai Under-16 ki kynthei.
Ïa ki takma rnong la khur da u Pringchang N. Sangma hadien ba u la lah ban kynthih ha ki 1.80M ha ka High Jump jong ka kyrdan ïalehkai Under-20 lem bad ka Anrisha Klein ha ka High Jump jong ka Under-18 da kaba la lah ban kynthih ha ki 1.50M bad kaba long ka rekod kaba thymmai jong ka.
Halor kane ka jinglah ban khur takma, na ka liang ka Meghalaya Athletics Association ka la ai khublei ïa ki nongjop ha katei ka lympung kiba la lah ban pynpaw ïa la ki sap ïalehkai jong ki ha ryngkat ka jingtrei shitom. Kane ka synjuk ka la ai khublei ruh ïa u coach u Pleasantly Synnah lem bad u Maradona (physio).
Kane ka synjuk lyngba ka kyrwoh ba la pyllait da u Secretary u Bah Finely Pariat, ka la pynpaw ka jingai khublei ruh ïa ka Director ka tnat ïalehkai ka Kong Isawanda Laloo (IAS) bad kumjuh ïa ka Sorkar Jylla kaba la kyrshan lem ïa ka synjuk na ka bynta ka leit ka wan jong ki nongïalehkai sha katei ka lympung.
