Shillong, Risaw 19
Ka jingïalehkai bha u Virat Kohli ban khyrwit ïa ka spah run kaba 48 ha ka ODI ha ryngkat ka jing-kyrshan lang u KL Rahul (not out) ka la pynlong ïa ka India ban bteng ïa ka jingjop kaba saw sien lynter ha ka ICC World Cup.
Kane ka kynhun ka la lah ban pynliem ïa ka Bangladesh da 7 wiket ha ka sngi Palei ha Pune.
Ha kane ka jingïakhun ka Bangladesh kaba la shimti ban tied nyngkong, ka la buh ïa ka thong da kaba kamai 256 run bad shah pynkhyllem 8 wiket ha ki 50 over. Katba ar ngut ki nongtied kiba la lah ban khyrwit ïa ki shiteng spah ki long u Litton Das uba la tied 66 run na ki 82 bol (7x4s) bad u Tanzid Hasan uba la tied 51 run na ki 43 bol (5x4s & 3x6s).
Ki nongkawang bol ka India kiba la lah ban khur mar 2 wiket ki long u Jasprit Bumrah, Moham-med Siraj, Ravindra Jadeja, katba ïa ki shi wiket la khur da u Shardul Thakur bad u kuldeep Yadav.
Haba wan shimti ïa ka pali ba ar, ka India ka la lah ban kynjoh sha ka thong ha ki 41.3 over bad shah pynhap 3 wiket. U Kohli u la khyrwit ïa ka spah run da kaba ïoh 103 na ki 97 bol (6x4s & 4x6s). U Shubman Gill (53 run) bad u kapten Rohit Sharma (48 run) ki la lah ban synñiang lem sha ka kynhun.
Kham hashwa ka India ka la duh noh ïa uwei na ki rangïalehkai kriket ba kynsai u Hardik Pandya uba la mynsaw ha kane ka jingïakhun bad u la hap ban mih noh na madan ïalehkai.
Kane ka la jia ha ki khyndai over ha ka por ba u Pandya u dangpyrshang ban kawang ïa ka bol ba la tied da u rangïalehkai ka Bangladesh u Litton Das. Te kumta u Pandya um shym la lah ban bteng bad la wan shimti ban kawang bol noh da u Kohli na ka bynta ki lai bol kiba dangsah.
Kane ka jingbym lah shuh ban bteng ha ka ban ïalehkai ka la pynlong ban mih bujli noh kum u nongkawang bol da u Suryakumar Yadav ha ka jaka jong u.
“Ïa ka jingmynsaw u Hardik Pandya la shim khia ban bishar bniah lyng -ba ki lad jingsumar,” la pynpaw ka BCCI.
Ka India kan pynkhreh ïa ka jingïakhun ka ban wan pyrshah ïa ka New Zealand ha ka 22 tarik mynta u bnai.
