Shillong, Risaw 19
Ka Shillong Lajong Football Club ka la rah ïa ka nam lahduh ha ka lympung ïalehkai 29th All India Bodofa U.N Brahma Gold Cup Football Tournament 2023.
Kane ka nam jop ka la wan hadien ba ka la lah ban pynliem noh ïa ka ASEB Sports Club kaba na Guwahati da 1-0 kol ha ka jingïakhun final kaba la long ha ka sngi Palei ha madan Udalguri Nalbari, Assam.
Ïa kane ka shi kol la thep da u Phrangki Buam, uba la ïohpdiang ruh ïa ka nam Best Player of the tournament.
Haba phai sha ki jingïakhun semi final, ka ASEB ka la lah ban pynliem ïa ka Nongrim Hills SSCC, katba ka Lajong ka la jop ïa ka Orgeng FC kaba na Dimakuchi da 4-2 kol. U rangïalehkai shakhmat na Senegal u Karim Samb u la thep ar kol, katba ïa ki shi kol la thep da u rangïalehkai na Brazil u Renan Paulino lem bad u kapten ka kynhun u Hardy Cliff Nongbri.
Kane ka long ka jingjop kaba ar ha kane ka jingïaid lynti ka Lajong hashwa ba kan jam sha ka I-League. Kham hashwa kane ka kynhun hapoh ka jingïalam u Bah Bobby L. Nongbet (coach) ka la khur ïa ka jingjop ha ka Chakradhar Deka Football Tournament kaba la long Assam.
“Kine ki lympung ïalehkai ki long shi bynta kum ka jingpynkhreh ïa ka I-League bad kane ka kynhun ka la nangïaid kiew shaphrang. Ha kajuh ka por kane ka lympung ka long ka jingplie lad ïa ki rangïalehkai ba kin nangkiew shaphrang ha ka rukom ïalehkai,” la ong u Bah Nongbet.
Te kumta kane ka kynhun ka la khmih lynti ba kan nang bteng ha ka ban ïalehkai bha ha ka I-league ka ban sdang mynta u bnai. Ka Lajong kan pynkhreh ïa ka jingïalehkai kaba nyngkong shabar na la ïing pyrshah ïa ka Mohameddan Sporting ha ka 3 tarik u Naiwieng ha Kolkata bad kan wanphai sha la ïing na ka bynta ka jingïakhun pyrshah ïa ka Neroca FC ha ka 9 tarik.
