Nongpoh, Risaw 19
Sa shisien pat ka Aven-turous Hynñiewtrep Off Roaders (AHOR) ha ka sngi Palei ka la sdang biang ïa ka lympung ïakop ñiah kali ha ki surok khohruh khohram ïa kaba la tip kum ka 5th AHOR 4×4 Off-Road Challenge 2023 ha Kharsati Park, Ri Bhoi District.
Ha kane ka lympung ïakop ñiah kali ha ki surok khohruh khohram ka ban neh lai sngi lynter, ki don haduh kumba 60 ngut kiba wan ïashim bynta na kylleng ka thaiñ shatei lam mihngi bad ruh na ka Jylla, ba kynthup ïa ki kynthei nalor ki shynrang.
Ïa ki nongïakhun ha kane ka lympung, la phiah ha ki saw kyrdan, kata ba kynthup ïa ki kynthei, ki kali (ladies category) ki bym pat pynkylla (stock category), ki kali kiba la pynkylla malu mala (semi-modified category) bad ki kali kiba la pynkylla naduh ki engine bad kiwei kiwei de ki tiar (modified category) ki ban ïakhun ha la ki jong ki jong ki surok khohruh khohram katkum ba kitei ki kyrdan kiba la kdew.
U President ka AHOR, u Bah Damian Umdor haba ai jingkren ha kane sngi plie ïa kane ka lympung, u la ong ba ki nongïashim bynta na kylleng ki jylla jong ka thaiñ shatei lam mihngi ki la wan ban shim bynta ha kane ka lympung ka ban pynshongshit ruh ïa ki nongpeitkai. U la ïathuh ruh ba nalor ki 60 ngut kiba la dep ban pynthikna ban ïashim bynta, ki dang don ruh ki ban sa dangpoi bad pyntip ba ki surok khohruh khohram kiba la pynkhreh mynta ka kynti ki dei kiba kham eh ha kaba ki nongñiah ki hap ban sei ïa la ki sap ki phong ñiah kali ki jong ki ban long ki nongjop.
Shuh shuh u Bah Umdor u la pyntip ruh ba mynta ka sngi kan don ruh ka jingïakhun wat ha ka por miet bad kyrmen skhem ba ki paidbah riew ïeid ïa kum kane ka jaid jingïalehkai ba kin wan ban peit dalade ban ïohi ïa ka jingshongshit bad ka sap ka phong jong ki nongñiah ha kane ka lympung.
