New Delhi, Risaw:
U nongaiktien jong ka External Affairs Ministry u Arindam Bagchi u la shah thung kum u nongmihkhmat ka India sha United Nations (UN) bad kiwei pat ki kynhun ba shabar ri ha Geneva.
U Bagchi, uba long u dkhot jong ka kynhun ki heh ka Indian Foreign Service (IFS) jong u snem 1995, u la shimti ïa ka kam kum u nongaiktien jong ka Ministry of External Affairs (MEA) ha u Lber jong u snem 2021 bad u la long uba la tbit ban treikam halor ki jingmih ki jyrwit-jyrwat ha kiba bun ki mat kynthup ha kaba ïadei bad ki jingeh kiba mih ha ki bynta khappud jong ka bynta ba shaphang Mihngi jong ka Ladakh, ban ïarap ha ka por ba don ka khlam COVID-19 bad ka New Delhi’s G20 Presidency.
Ha Geneva, u Bagchi un sa shimti ïa ka jaka jong ka Indra Mani Pandey kaba la thmu ban wanphai noh sha New Delhi. “U Arindam Bagchi, ïa mynta u la long u Additional Secretary ha ka Ministry of External Affairs, une u la shah thung ban long u nonglamktien ne u nongmihkhmat ba neh jong ka India sha United Nations bad kiwei pat ki kynhun ha Geneva,” la ong ka MEA ha ka jingthoh ba ka la phah ha ka lah sngi U Blei. “La khmih lynti ba un sa sdang shen ïa ka kam jong u,” la ong ka jingthoh.
