Shillong, Risaw 19
Ka kynhun ïalehkai kriket ka Jylla ka la bteng biang ïa ka jingshah rem sa ha ka Mizoram da 20 run ha ka lympung ïalehkai Syed Mushtaq Ali Trophy T20 kaba ka long ha ka sngi Palei ha Jaipur.
Watla ka Meghalaya ka la khmih lynti ban khur ïa ka jingjop, hynrei kam shym la lah ban pynliem ïa ka Mizoram. Ka Meghalaya ha kane ka jingïalehkai ka la jop ïa kynting pisa bad shimti shwa ban kawang nyngkong. Te ka Mizoram haba wan ban tied ka la lah ban kamai 163 run bad shah pynkhyllem 6 wiket ha ki 20 over. Katba ka Meghalaya haba wan beh ïa ka thong ka la kamai tang 143 run bad shah pynkhyllem 7 wiket.
Ha kane ka jingïakhun ka Mizoram ka la lah ban kamai bun eh lyngba u Agni Chopra, uba la ïoh ban khyrwit 94 run na ki 48 bol hashwa ba un shah pynkhyllem noh ha u Akash Kumar Choudhary (1/21). U Rajesh Bishnoi u la long tang marwei na ki rangïalehkai (guest player) ka Jylla uba la khur 2/32, katba u Lerry G Sangma (1/22) bad u Chengkam Sangma (1/27) ki la khur mar shi wiket.
U Lerry u la lah ban pynpaw ïa ka jingtbit ha ka ban tied ha kaba u la ïoh ban khyrwit 36 run (2x4s, 2x6s), katba u Junjun Sangma, uba la ïoh ban ïalehkai ha ka sien nyngkong ha ka T20, u la tied 21 run na ki 20 bol (3x4s). Kine ki ar ngut ki nongtied ki la noh synñiang lang ban kynjoh sha ki 35 run ha ki 4.2 over.
Ka Meghalaya kan pynkhreh biang ïa ka jingïakhun ka ban wan pyrshah ïa ka Chhattisgarh ha ka sngi Saitjaiñ.
Kham hashwa, kawei pat ka kynhun ki ‘thei ïalehkai ka Jylla kaba la ïakhun nyngkong eh ha ka Senior Women’s T20 Trophy jong ka BCCI ha Vadodara, ka la shah rem noh ha ka Pondicherry da 77 run.
Ha kane ka jingïakhun ka Pondicherry ka la buh ïa ka thong da kaba kamai 150 run bad shah pynkhyllem 4 wiket ha ki 20 over, hynrei ka Meghalaya ka la lah ban kamai tang 73/9.
Kane ka kynhun kan bteng biang ban ïakhun ha ka sngi Thohdieng pyrshah ïa ka Karnataka.
Ha kawei pat ka liang, ka kynhun ki rangïalehkai U-19 ka Jylla kan pynkhreh ban ïakhun ha ka Vinoo Mankad Trophy pyrshah ïa ka Maharashtra ha Vijayawada.
