Chandigarh, Risaw
U dkhot jong ka Congress Working Committee u Shashi Tharoor u la ong ba u la don ka jingsngew ba ka seng jong u ka lah ban jied ïa u heh nongïalam jong ka seng u Mallikarjun Kharge ne ïa u President barim jong ka AICC u Rahul Gandhi kum u Myntri Rangbahduh lada jia ba ka kynhun synrop INDIA ka wan ha ka bor synshar ha ka ilekshon Lok Sabha 2024.
U Tharoor u la ong ba ka lah ban don ka jingsngew kyndit ha kaba ïadei bad ka jingpynbna nongjop ha ka ilekshon jong u snem ban sa wan namar ka jingdon jong ka kynhun synrop ka liang pyrshah bad ka lad ka kabu jong ka kynhun INDIA ba kan wan ha ka bor synshar kum ka sorkar kmie da kaba pynrem noh ïa ka kynhun NDA hapoh ka jingïalam jong ka seng BJP ha ka General Elections.
“Kumta la dei tang ban shu ap bad peit,”u la ong ha ka por ba u la ai jingkren ha ka jingplie ïa ka shlem treikam jong ka Silicon Valley-incubated D2C (Direct-to-Consumer) Marketplace Way.com ha Technopark.
