Shillong, Risaw 20
Ki syntiew ki skud ki dei napdeng ki katto katne ki jingthung kiba bun ki briew ki sngewtynnad ban thung ha hakhmat bad sawdong ka ïing. Kane ym tang ba ka pynitynnad ïa ka ïing ka sem hynrei lah ruh ban ïoh ïa ka lyer iwbih bad lyer khuid.
Hynrei na ka bynta ki katto katne, ki syntiew ki dei ruh ka kam rep kaba long ka jingkamai kaba lah ban kyrshan ïa ka ïing ka sem.
Kumta ka jingthung ïa ki syntiew ka la long ruh ka kam bad ka jingkamai ïa kawei ka longkmie, kata ka Kong Biloris Warjri kaba na ka shnong Mawkriah kaba la ïaid mynta la 30 snem ei ei ban rep syntiew bad long kaba nyngkong eh ban pynïaid ïew ha nongbah Shillong bad ruh sha kylleng ki jaka.
Ryngkat kiwei pat ki nongrep syntiew, ka Kong Biloris Warjri, kaba ju smat ban ïashimbynta ha ki jaka pyni nam bad ki ïew die syntiew, ka la wan ban ïashimbynta ha ka jingpyni syntiew por synrai kaba la pynlong da ka Shillong Agri-Horticultural Society (SAHS) ha All Saint Hall kaba la sdang ha ka 18 tarik bad kut noh ha ka 20 tarik u Risaw 2023.
Da ki hajar ngut ki paidbah ki la wan sha kane ka jaka pyni nam ïa ki syntiew ym tang ban shu peitkai, hynrei ban thied ruh ïa ki syntiew bun phew jait kiba la wanrah da ki nongrep syntiew. Ka Kong Biloris kaba la sdang nyngkong ban rep syntiew ha shnong Mawkriah, ka la ïathuh ba ka la sdang ïa kane ka kam 30 snem mynshwa ha ka por bym pat don kiba shim ïa ki syntiew kum ka lad aikam aijam bad jingkamai.
“Ha ka por bym pat don kiba rep syntiew nga la sdang ïa kane ha shnong lajong ha Mawkriah namar ka jingbym ïoh kam. Hadien ba nga la pyndep ïa ka Class-XII bad ka jingbym ïoh kam, nga la sdang ban rep, hynrei namarba kam biang ka rep, nga la sdang noh da ka rep syntiew,” la ong ka Kong Biloris.
Ka la ong ba ka shnong Mawkriah ka dei kaba ki briew ki long kiba duk bad im da kaba rep ïa ki jhur, hynrei ynda ka sdang maka ïa ka rep syntiew, ka la ïalam lynti ïa ka bad ïa kiwei ki para shnong ruh.
Haba batai ka rukom rep syntiew, ka Kong Biloris ka la ong, kane ka kam ka dei kaba sngewtynnad ban trei bad kaba donkam eh ka long ban trei shitom bad hap ban buh ruh ïa ki briew ban peit ban sumar ïa ki syntiew naduh dang rit.
Ka la ïathuh ba kum ka nongrep syntiew, ka la lah ban aikam lem ïa kiwei ba dym duna shuh ïa 10 ngut kiba treilang ha kane kam.
Ka Kong Biloris ka la lah ruh ban pynshlur lem ïa kiwei pat ban shim ïa ka rep syntiew kum ka kam kaba lah ban ai jingkamai.
Haba kylli shaphang ki skhim Sorkar bad ki lad jingïarap na ka bynta ki nongrep syntiew, ka Kong Biloris ka la ong ba ka la ïoh ki jinghikai nalor ki symbai bad poly house na ka Sorkar.
U President ka Shillong Agri-Horticultural Society (SAHS) u Bah Maqbool Lyngdoh Suiam, u la ïathuh ba ïa kane ka Society la seng naduh u snem 1977 bad kane ka Society ka la ju pynlong ïa ka jingpyni syntiew la bun phew snem kaba long ka lad ïa ki nongrep syntiew ban pyni ïa ki syntiew jong ki kiba bun jait.
U la ong ba kumba saw snem la lah ban pynlong biang ïa kane ka jingpyni syntiew khamtam hadien ba la shah pynwit ha u COVID-19. Ha kane ka jingpyni syntiew, ki la don 25 tylli ki dukan nalor ka jaka ïakop pyni syntiew.
La ailad ruh ïa ki khynnah skul ban ïashimbynta ka jingïakop pynbeit syntiew (floral arrangement), nalor ki nongrep syntiew. U Bah Maqbool u la ong ba nalor ka jingpyni syntiew por Synrai yn sa pynlong ruh ïa ka jingpyni syntiew por Lyiur bad kan dei kaba kham heh ban pyni ïa ki syntiew kiba bun phew jait.
“Ngi don ka thong ban pynlong sa ka North East Flower Show bad ngi dang ïakren ïa kane namarba ngi kwah ban wanrah lang ïa ki nongrep syntiew na kylleng ka Thaiñ Shatei Lam Mihngi,” u la ong.
Haba kylli shaphang ki skhim ka Sorkar ban kyrshan ïa kiba kwah ban rep syntiew, u Bah Maqbool u la ong ba ki don ki skhim bapher ban ïarap ïa kiba rep syntiew bad ha ki snem kiba mynshwa ka Sorkar ka pyntreikam ruh ïa ka Technology Mission lyngba ka tnat horticulture bad ki don ruh ki Horti Hub kum ha Upper Shillong.
U la ong ba kiba rep syntiew ki bun na thaiñ Mawkriah, bad kham mynshwa tang ha East Khasi Hills district, ki la don kumba 100 ngut ki nongrep syntiew.
Namar kata, u Bah Maqbool u kyrmen skhem ki nongrep syntiew kin nang kham bun shuh shuh namar kane ruh ka dei ka kam kaba lah ban kyntiew ïa ka ïoh ka kot ki nongrep bad lah ban aikam aijam lem ïa kiwei.
