Gaza, Risaw:
Katkum ka kaiphod ba la ioh lum da ka tnat ka koit- ka khiah jong ka Gaza, la ong ba ki don 3,785 ngut ki nong Palestine ha Gaza kiba la khlad bad duh noh ka jingim ha ka jingleit pynhiar kput jong ka Israel ia ki lehnoh Hamas hapoh Gaza. Kumjuh ruh ki la don haduh 12,493 ngut pat kiba la mynsaw na kitei ki jingther bom bad jingther ‘namding jong ka Israel sha Gaza naduh kaba sdang jong ka thma ha ka 7 tarik u Risaw tad haduh jong katei ka Sngi Palei.
Napdeng kitei baroh, ki 1,524 ngut kiba khlad ki dei ki khyllung- khynnah bad 1,000 ngut pat ki dei ki kynthei.
Kumjuh ruh la ong ba kumba 44 ngut ki nongtrei jong ka koit- ka khiah ki la duh noh ia ka jingim jongki hapdeng ka jingther bom jong ka Israel sha Gaza, ha kaba 4 tylli ki hospital pat ki la julor bad ki la hap ban khang khyrdep noh bad kumba 14 tylli ki jaka sumar kiba rit ki la sangeh treikam noh syndon.
Kumta, la ong ba ha kane ka por, ym don shuh wat tang ki jaka ai dawai bad ki dawai- dashin ki la lut- lut baroh hapoh Gaza namar jong ka thma hapdeng ki lehnoh Hamas bad ka Israel.
