New Delhi, Risaw:
Ka ïingbishar ha Delhi ha ka sngi Palei ka la pdiang ïa ka jingkyrpad jong u heh nongïalam jong ka seng Aam Aadmi Party u Manish Sisodia ba un pyndonkam ïa ka pisa MLA ba la kynshew na ka bynta ban pynleit ha ki jingtrei ki ban wanrah ïa ka roi ka par ha ka Assembly konstitwensi ha Patparganj.
Hadien ka jingmynjur jong ka ïingbishar, ki la don kumba katto katne tylli ki jingtrei ïa kiba la ithuh kum ha ka ban pynbha ïa ki surok, ka jingbuh ïa ki Pipeline bad ka jingshna ïa ki jaka pynïeng kali bad kiwei pat bad ïa ka shithi ha kaba ïadei bad ki jingthmu pyntreikam la phah sha ki tnat ba dei khmih, la ong ka jingthoh kaba la wan na ka jaka treikam jong u MLA.
U Sisodia u la pynshai ba ki surok bad ki Pipeline ha kiba bun ki jaka ki la sniew bad julor lut bad kine baroh ki la long na ka jingtap jong ka um ha ka por ba wan ka jinghap jong u slap uba jur.
Kumba la sakhi, la ong ba baroh ki jingpyntreikam la dei ban pyndep kumba la thmu hashwa ban wan lap biang ka aïom Lyiur khnang ba ki nongshong shnong kin ym shah ktah kumba ju long ha kane ka thaiñ, la bynrap shuh shuh ka jingthoh kaba la wan na ka jaka treikam jong u MLA.
U MLA jong ka Patparganj u la kyrpad ruh ban buh ïa 200 tylli ki ben ha ki 28 tylli ki jaka shangkai pyngngad bad 52 tylli ki jaka sah kynhun ha ka konstitwensi jong u.
“Kum ka jingbynrap ktien shuh shuh, u la kyrpad ruh ba la dei ban buh ar tylli ki jingker ha Pocket-F, Mayur Vihar Phase-2 na ka bynta ban wanrah ki lad jingïada bad ban don ka jingshngaiñ,” la bynrap shuh shuh ka jaka treikam jong u MLA.
