Mawkyrwat, Risaw 20
Ka Nonglang Sports Club ha ka jingïaid lynti da ki phew tylli ki snem ha ka sngi Thohdieng ka la sdang ïa ka jingrakhe ïa ka Jubili Ksiar lane ka jingdap 50 snem jong kane ka klob ha madan Pyndenïew Lyngdoh, Nonglang, South West Khasi Hills District.
Ïa kane ka jingrakhe lehkmen lyngkhuh dap 50 jong ka klob la plie pyrda da u Bah Y. G Lyngdoh, Working President MDSA kum u kongsan ha ryngkat ka jingdonlang u Bah Firsterlin Kharraswai, Myntri Shnong Nonglang, Bah Francis Donbok Kharlyngdoh, President Seng Samla Shnong Nonglang, Bah Kordorlin Kharlyngdoh, Secretary Nonglang SC, ki seng longkmie ki dkhot VDP, ki nonghikai ki khynnah skul bad kiwei kiwei.
Kum ka dak ka jingplie ïa ka jingrakhe ïa ka Jubili Ksiar, ka Nonglang Sport Club ha kane ka sngi ka la ïoh ban pynlong da ka jingïalehkai phutbol Inter- Dong ha kaba ka Nongdom ka la jop da 2-0 kol ïa ka Pynden Jathang.
U Bah Kordorlin Kharlyng-dong, Secretary Nonglang SC u la ïathuh ruh ba nalor ka phutbol, kin don ruh sa kiwei ki jingïalehkai kum ka marathon, carrom Board, Athletics, Archery, Badminton, Mawpoiñ, Volleyball bad kiwei kiwei ha kaba naduh ki hep kiba rit, ki samla bad ki longkmie longkpa kin ïoh ban ïashim bynta ha kane ka jingrakhe dap 50 snem ka klob ka ban sa pynkut ha u snem 2024.
Ha kane ka sngi la pyniphuh iphieng shuh shuh da ki jingshad na ki khynnah skul ka Bethel Secondary School bad ka Nonglang Secondary School.
