Washington, Risaw:
Ka tnat US Central Command (CENTCOM), ha ka Sngi Balang ka la iathuh ba ki bor pahara jong ka America ki la ioh siat pynbthei ia 2 tylli ki drone bad ki la ioh ban siat pynjulor pat ia kawei ka drone ha Iraq hapoh jong ki 24 kynta ba la leit. Ha katei ka jingjia ki don katto katne ki shipai kiba la mynsaw.
Katba, katei ka tnat kam shym la pynshai pat ba dei mano kiba phah bad kiba pyntreikam ia kitei ki drone, katba la ong ba kitei ki drone jong ka Iran, ki long ka jingma ia ki shipai America namar ka jingai jingkyrshan jong ka United States ia ka Israel ha ka jingiakhun thma jongka Israel pyrshah ia ki lehnoh Hamas ha kane ka por.
Kumta, la ong ba hapoh jong kine ki 24 kynta ba la leit noh, ka tnat shipai jong ka United States ka la ioh ban tehlakam noh ia kitei ki drone kiba leit poi shajan jong ka United States ha ki bynta khappud jong ka US bad ka Iraq.
La ong ba ki bor pahara ka US ki la ioh siat pynhap ia kitei ki 2 tylli ki drone kiba wan her na ka phang West jong ka Iraq bad kawei pat ha ki bynta North jong ka Iraq ha ka miet Sngi Balang bad Kyllastep jong ka Sngi Palei.
Katei ka jingioh siat pynhap jong ki shipai US ia kitei ki drone ka long ruh tang hadien shi sngi ba ka hospital jong ka nongbah Gaza ka la shah ther bom bad da ki spah ngut ki la khlad bad duh ei noh la ka jingim ha katei ka jingjia, ha kaba ki lehnoh Hamas ki la kynnoh ia ka Israel, katba ka Israel ruh ka la kynnoh kylla ia ki lehnoh hi bad ym shym la don ba shim jingkit khlieh halor katei ka jing-leit ther bom sha katei ka hospital kaba don hapoh Gaza.
La ong ba ki lehnoh Hamas ki la leit hiar thma kyndit ia ka Israel ha ka 7 tarik u Risaw, ha kaba palat 1,400 ngut ki paidbah ka Israel, kham bun ki dei ki paidbah kiba la khlad ha katei ka jinghiar thma jong ki lehnoh Hamas bad kitei ki lehnoh ki la rah bor ruh da ki spah ngut ki nong Israel ha katei ka por.
Hynrei, hadien ba ka Israel ka la pynbna ia ka thma hapdeng ka Israel bad kitei ki lehnoh Hamas jong ka ri Palestine, ka jingpynhiar kput jong ka Israel bad ka jingleit ther bom ba khlem sangeh jong ka Israel, ka la shim ia ka jingim jong palat 3,500 ngut ki nong Palestine kiba shong hapoh Gaza bad kiba bun ki dei hi ki riew paidbah.
