Jerusalem, Risaw:
U Myntri Rangbahduh ka ri Israel, u Benjamin Netanyahu ha ka Sngi Palei, u la ong ba ka jingleit hiar thma jong ki lehnoh Hamas ka long ban pynthut ia ka shongsuk-shong shngaiñ jong ki thaiñ Middle East, bad kumta ruh u la kyntu ia u Myntri Rangbahduh ka Britain u Rishi Sunak ba un nang iai kyrshan ia ka ri Israel katba ka thma hapdeng ka Israel bad ki lehnoh ka Palestine ka dang iaid shakhmat.
Kumjuh ruh na ka liang u Myntri Rangbahduh ka Britain ruh, u Rishi Sunak u dang shu wan jurip shen na Jerusalem kum shi bynta ban pynpaw ia ka jingai jingkyrshan ia ka Israel bad ban ialeh ruh kumno ban kyntu ia ki lehnoh Hamas ba kin pyllait noh ia kito kiba la shah rahbor bad shah bat ha katei ka kynhun lehnoh naduh ba sdang jong ka thma ha ki khyndiat taiew ba la leit jong mynta u bnai.
Hadien katei, utei u nongialam ka Britain u la leit her noh pat sa sha ka ri Saudi Arabia, ha kaba u la leit ban iakynduh ia u Crown Prince Mohammed bin Salman bad u la ioh ban iakren ia ki jingthmu kumba la pynpaw da ka United States ruh haba iadei bad ka jingthaw lad kumno ban wanrah ia ka jing-iadei kaba jan bad ka Israel.
U Netanyahu u la ong ba ka jingwan thombor na Gaza da ki lehnoh Hamas jong ka Palestine, ka la shim ia palat 1,400 ngut ki mynsiem ba lui-lui jong ka Israel bad u la ong ruh ba katei ka jingleh jong ki lehnoh ka long ban pynthud ia ka jing ang-nud jong ka ri ban wanrah ia ka shongsuk- shongsaiñ. Kumta ruh u Netanyahu u la ong ba kine ki long ki sngi kiba dum tam ia ka Israel bad ka jingma kaba khraw ka long namar ba la iohi ba kane ka thma kan nang jur bad nang kham neh slem.
La ong ba u Rishi Sunak u la leit ban iakynduh bad u Netanyahu hadien ka jingiakren bad u President ka Israel- u Isaac Herzog. Ha kajuh ka por ruh la ong ba kitei ki nongialam jong ka Israel, ki la pdiang ia ka jingtyrwa jong kiwei pat ki ri bad ki la mynjur ban ailad ia ka jingpynpoi mar bam sha ki paidbah nongshong shnong ka Gaza bad ka Israel ka la ialeh ruh ban nym wanrah jingeh ne pyn shitom ia ki paidbah nongshong shnong ka Gaza.
Ha ki khyndiat por ba la leit, u Sunak bad u Herzog ki dang dep iakren halor ka jingdonkam ban kiar na ki jingïakynad ha kitei ki bynta, namar kan long ruh ka jingma kaba khraw ia kiwei ruh ki para ri ba marjan lada ka thma ka jia shi jia khah-khah na kawei ka ri sha kawei ka ri.
Kumjuh ruh haba iadei pat bad ka jingshah ther bom ka hospital ha Gaza, ka Israel ka la kyntait ia ka jingshah pharep halor ka jingthombor ia katei ka jakasumar bad kumjuh ruh u President ka United States- u Joe Biden u la ong ba ka US ka ai jingkyrshan ia ka Israel bad ka ngeit ruh ba ka Israel kam shym don bynta ha katei ka jingther bom ia katei ka hospital ha katei ka por.
