Lehse ka long ha ka sien banyngkong ba kano-kano ka Dorbar Shnong ha Ri Khasi Jaiñtia kan mih shakhmat ban kyntu ïa ki trai jaka/trai ïing kiba dei ki Khasi ban phah noh da ki bahaïing hasem jong ki ban wan sah ha ki ïing ki sem jong ki namar ba kiwei pat ki jaitbynriew ki la kham bun ban ïa ki trai ri trai muluk. Kane ka dei shaphang ka shnong Mawbah kaba don ha sor Shillong, bad ka Dorbar jong kane ka shnong ka la pynmih ïa kaba kum katei ka jingkyntu hadien ba ki Khasi kiba shong ha kane ka jaka ki don sa tang kumba 700 ngut katba kiwei pat ki jaitbynriew ki don palat 12,000 ngut. Ka jingtam da jan ar shah ïa ki Khasi da kiwei pat ka jaitbynriew tang ha kawei ka shnong kaba don ha sor Shillong ka long kaba khia.
Ka thaiñ Mawbah bad ki shnong ba marjan bad ka, ki long shisha kiba la khapngiah haduh katta-katta. Ka jingbun ïing bad ki briew ka la long kaba i shyrkhei. Ban ïaid ban ïeng ha ki surok jong kine ki jaka ruh ka la long kaba jynjar. Ngim tip thikna ha kano ka rukom ki briew kiba dei na kiwei pat ki jaitbynriew ki ïoh ban rung bad ban sah syndon ha kine ki shnong. Ka la don ka khep ba ki Khasi ki khlem lah ban bat shuh ïa ka bor shnong ha Mawbah na ka daw ba ki shah tyllep ha kiwei pat ki jaitbynriew. Hynrei ki la don pat ki Rangbah Khasi kiba la knieh biang ïa ka bor shnong na kita kiwei pat ki jaitbynriew, bad mynta ka Dorbar Shnong ka ïeng bad ka khih ka ksar. Donbok ba dang don kiba kum kita ki Rangbah Khasi kiba la shlur ban knieh ïa la ka jong ka hok ka sot bad kiba khlem ailad ïa kiba nabar ban wan tuklar halor ka synshar ka khadar shnong.
Ka la dei ka por ïa ki trai jaka/trai ïing kiba don jaka/ïing ha Mawbah bad ki jaka ba marjan ba kin ïa pyrkhat thymmai. Ngi sngewïahap ïa ka jingkyntu jong ka Dorbar Shnong ïa ki trai jaka/trai ïing ban phah wan da ki bahaïing jong ki ban sah ha kito ki ïing kiba mynta la shim wai da kiwei pat ki jaitbynriew. Ka la donkam palat ka jingkylla namar la i shyrkhei ban peit ïa ka jingjyllei jong ki briew kiba nabar bad na kiwei pat ki jaitbynriew. Kam i kop shuh ba ka dei kata ka Shillong namar la eh ban wad ïa ki Khasi ha kane ka thaiñ baroh kawei. Namarkata, kito ki trai jaka/trai ïing ki dei ban ailad noh ïa ki Khasi ban shong ban sah wai ha ka dor kaba bit bad ym ban ïa am than ïa ka dor ka mur namar ngi sngewthuh ba kiba bun hi, ki Khasi kim kot bor kum kiwei ki jaitbynriew ha ka jingdon ïa ka spah ka phew. Tangba lano kan wan kaba kum kata ka jingkylla?
Sa kawei pat ka sien jam ba ka Dorbar Shnong Mawbah ka la rai ban shim ka long ba nangne shakhmat ïa ki briew kiba nabar kiba kwah ban wan sah ha kane ka shnong kin ym shah shuh hynrei kin pdiang beit thik tang ïa kine kiba la don lypa. Tang kiba la don lypa ruh la itriem ban peit namar ka jingkhapngiah ka la long shaba palat. Ka la dei ka por ïa ki bor sorkar ban leit rung sha Mawbah bad ki jaka ba marjan ban sorjamin la ki ïing ki sem ki long ne em kiba shngaiñ ban ïashong ïasah. Lada la khapngiah shaba palat, kan buh jingma khamtam ha ka por ba wan ki jingjia pluh ïing kumba ngi la ïohi nuksa na kaei kaba la jia ha Khyndailad ha ka Sngi Saitjaiñ jong ka taïew ba la dep. Dei ban khmih ruh ïa ki kot ki sla jong ki briew kiba nabar bad kiba wan sah wai ha kine ki thaiñ ban pynthikna ba ki dei ki nongshong shnong bapura ka Ri India bad ym kiba na kiwei pat ki jaka. Ïa kaba kum kane ka sorjamin donkam ban leh ha baroh ki jaka ba shong khleh bad kiba khapngiah khnang ba ngin lait na ki jingma hadien habud.
