Mumbai, Risaw:
U President jong ka seng Congress ha Madhya Pradesh u Kamal Nath ha ka sngi Ba-ar u la pyllait ïa ki mat treikam jong ka seng na ka bynta ka ilekshon Assembly ka ban sa long, ha kaba ka la buh ki jingkular kynthup ha kaba ïadei bad ka jingwanrah ïa ka Health Insurance kaba T. 25 lak halor ka koit ka khiah na ka bynta baroh ki nongshong shnong jong ka MP, ka bhah kyrpang kaba 27 per cent na ka bynta ki OBC bad thaw ïa ka kynhun IPL jong ka jylla.
Ka seng Congress ka la buh ïa 59 tylli ki jingkular ha ka thup pyntreikam kaba don 160 sla, ha ryngkat ki jingkular ban ai jingïarap ïa baroh ki kynhun, kynthup ki nongrep, ki kynthei bad ki nongtrei sorkar. “Ngin pynbiang ka jingïarap ha kaba ïadei bad ka Health Insurance kaba T. 25 lak, kaba don ruh ka jingsiew kaba T. 10 lak lada jia ki jingjia ha ka por bym poi pyrkhat na ka bynta baroh ki briew,” la ong u Nath ha ka por ba u la pyllait ïa ka mat treikam. Ka Madhya Pradesh kan sa don ruh ïa ka kynhun Indian Premier League (IPL) jong ka jylla, u la ong.
U Nath u la pynbna ruh ba yn sa map noh ïa ki ram jong ki nongrep haduh T. 2 lak bad ban ïarap pisa da kumba T. 1,500 man u bnai sha ki kynthei. U la kular ruh ban pynbiang ïa ki LPG Cylinder ha ka dor T. 500, ban pyllait ei ha ka ban pynïoh jingnang jingstad ha ki skul, ban pyntreikam ïa ka Old Pension Scheme bad ban ai jingïarap pisa na ka bynta ki samla ki bym donkam-donjam ha kaba pynkiew na ka T. 1,500 sha ka T. 3,000 shisien shi bnai na ka bynta ar snem. Ka ilekshon ban jied ïa ki 230 ngut ki dkhot jong ka ïingdorbar kan sa long ha ka 17 tarik, Naiwieng.
