Shillong, Risaw 20
Ka Meghalaya State Olympic Association lem bad ka tnat ïalehkai jong ka Sorkar Jylla ki la kitbok kitrwiang ïa ka kynhun ïalehkai ka Jylla ka ban leit ïashim bynta ha ka 37th National Games ka ban long ha Goa naduh 25 tarik mynta u bnai haduh 9 tarik u Naiwieng mynta u snem.
Ïa kane ka prokram la pynlong ha ka sngi Thoh-dieng ha State Convention Centre, Shillong ha kaba la ïadon lang u Myntri ka tnat ïalehkai u Bah Shakliar Warjri kum u kongsan, kumjuh u Commissioner ka tnat ïalehkai u Dr. Vijay Kumar, ka Director Kong Isawanda Laloo, ki nongïalam ka MSOA bad ki nongïalehkai.
Ha kane ka kynti kaba mynta ka Jylla kan phah haduh 45 ngut ki nongïalehkai ryngkat 20 ngut ki coach bad manager ha ki khyndai tylli ki jingïalehkai kiba kynthup ïa ka Athletics, Football ki shynrang, Swimming, Wushu, Boxing, Golf, Shooting, Kayak bad ka Sqay kaba dei ka jingïaleh -kai martial arts.
Hapdeng kane ka jing-leit ïashim bynta, don na ki jingïalehkai kiba la ïoh ban pynkhreh bha kum ka Football, Wushu, Boxing, Golf bad Kayak, hynrei ki don pat na ki nongïalehkai kiba la pynpaw ïa ka jingsngewsdiaw mynsiem namar ka jingbymbiang ki jaka ïalehkai bad don ruh ki bym pat ïoh ban pynkhreh namar ka jingbym ïoh jaka ïalehkai.
Lyngba ka jingïoh ban ïakren bad ki katto katne ki nongïalehkai ki la pynpaw ba ka jingïalehkai siat suloi ka long kawei kaba ïakynduh jingeh na ka daw ka jingbym biang jaka siat suloi ha kaba ki hap ban leit kilanmet ha ki jaka jong ki shipai tang ha ki por ba ki ai jingbit ia ki. “Ngi khlem pat ïoh ban pynkhreh eiei haduh mynta ruh, hynrei ngin ïoh ban kilanmet ha ka sngi U Blei ha ka jaka jong ki shipai tang ha ka por ba ki ai jingbit ma ki. Kane ka long ka jingeh kaba khraw ïa ngi namar ngim don ïa ka jaka ïalehkai kaba biang bad ka jaka ïalehkai jong ka Synjuk ka dei kaba tang 10 mitar. Hynrei da ka jingtrei shitom ki nongïalam ka synjuk kiba la lah ban pynïoh jaka ïa ngi ba ngin ïoh ban pynkhreh ha ka sngi U Blei,” la pynpaw kawei na ki nongïalehkai siat suloi ka samla Balarishisha Rani, ka ban ïashim bynta ha ka 25 air pistol.
“Ngi kum ki nongïa-lehkai ngi sngew diaw ba ngim shym la ïoh ban pynkhreh hashwa ba ngin leit ban ïashim bynta kat ha ka National Games, hynrei ngin pyrshang katba lah ban ïalehkai bha na ka bynta ban wanrah burom ïa ka Jylla.”
Ha kawei pat ka liang ka samla Pdiangsuklang Syngwan kan ïashim bynta ha ka 50m freestyle, hynrei ha ka pung Crinoline ka don ïa ka jingheh kaba tang 25miter.
“Kum ki nongïalehkai ngi donkam bha ïa ka pung jngi kaba biang (50m standard pool) namar ngim don hapoh ka Jylla jong ngi bad kane ka buh jingeh bha ïa ngi ki nongïalehkai haba ngi leit ïashim bynta shabar jylla,” la ong ka Pdiangsuklang ha kaba wat hapdeng kine ki jingeh, ka la ïoh ban pynkhreh ha katba lah ban kilanmet naduh ki khyndiat sngi ba la leit.
Kumjuh ka kynhun ïalehkai phutbol ka la ïoh ban pynkhreh bha na ka bynta kane ka lympung kumba ar bnai bad kaba sngew tynnad ka long ba uwei na ki rangapkol ka Jylla u Lionel Daryl Rymmei uba dangshen u la ïadon bad ka kynhun ïalehkai ka ri India kaba la khur ïa ka nam lahduh ha ka SAFF U-19 bad uba la khur ruh ïa ka nam Best Goal-keeper, un pynkhreh ban mihkhmat ha ka sien kaba nyngkong eh ïa ka Megha-laya ha ka National Games.
