Shillong, Risaw 20
Ka long ka jingsarong ia ka Jylla hi baroh kawei ha kaba lai ngut ki nongñiah saikil ka nongbah ki la shah jied ban mihkhmat na ka bynta ka Asian Continental Championship (Downhill Individual DHI) ka ban long ha Ponmudi hills, Trivandrum Kerala naduh 26 haduh 29 tarik mynta u bnai.
Kine ki nongñiah ki kynthup ïa u Apshai Griffith Niangti, Taitus Ch Marak bad ka Anissa Dariti Lamare.
U Apshai u dei uba la ïashim bynta teng bad khur jingjop ha ki jingïakop kiba la long ha ka thaiñ shatei lammih-ngi bad kumjuh ha ki national level ha kine ki phra snem ba la leit. U la khur takma ha ki jingïakop hapoh ka ri bad uba la wan ha ka thup kaba shiphew ha ka Asian Enduro series ha u 2019 kaba la long ha Nepal, hynrei mynta un pynkhreh ban mihkhmat ïa ka ri ha ka 28th Asian Continental Championship 2023.
Une u nongñiah saikil u la ïoh jingkyrshan tang na ïing ka sem jong u lem bad ka jaka die saikil kaba na Guwahati (SPOKEHUB), hynrei u la lah ban bteng ïa kane ka kam ha kaba u la ju khur ïa ki khusnam pisa ha kitei ki jingïakop.
Kumjuh u Taitus u la sdang ïa ka Mountain Biking ha u snem 2019 bad u ka lah ban jam shaphrang ha ka jingïakop ñiah saikil jong u. Lyngba ka jinglah ban wan ha ka thup kaba 10 ha ka National bad ba 5 ha ka thaiñ shatei lammihngi, u Taitus u la khmih lynti ba un nangkiew shaphrang.
Lyngba ka jingkyrshan kiba haïing hasem lem bad ka jingïarap lang ka SPOKEHUB, u la lah ban ïai bteng ha kane ka kam bad ban jam shaphrang ha ka ka jingïakop MTB ha ri India.
Haba phai sha ka Anissa Dariti Lamare ka la long ka kynthei kaba nyngkong eh ban ïashim bynta ha ka Downhill Mountain. Ka la ïashim bynta ruh ha ki kyrdan ïakop jong ki shynrang ha ki hynñiew snem ba la lah bad ka Asian Championships kan dei ka sien kaba nyngkong eh ban ïashim bynta ha ka kyrdan ïakop jong ki kynthei.
Ka jingjied ïa kane ka kynhun ki nongñiah saikil jong ka ri ka la long dangshen mynta u bnai ha ka jingïakop kaba la long ha Panchkula, Haryana bad saw ngut ki nongñiah ba kynsai ki la don ha ka thup ka jingpynkhreh kaba la long ha u Nailur ha kaba u Apshai bad ka Anissa ki la shah jied. Baroh lai ngut ki la iashim bynta ha kawei pat ka jingpyrshang ha kaba Apshai u la wan ha ka kyrdan balai, u Taitus u la wan ba san (reserved rider) bad ka Anissa ka la wan ha ka kyrdan ba-ar ha ka kyrdan ïakop jong ki kynthei.
