Shillong, Risaw 22
Ka Manchester United ka la ïoh ïa ka jingjop hadien ba la bteng biang ïa ka lympung English Premier League (EPL) ba la pynsangeh ar taïew namar ka jingdon jong kiwei ki lympung jong ki Ri.
Katba ha kawei pat ka jingïalehkai kaba itynnad bad ïakhaid bha, ka Chelsea ka la hap ban hun noh ban ïasam mar shi dor thong bad ka Arsenal hadien ba ka la dep ban tam lypa da 2 kol.
Haba phai sha ka jingïalehkai hapdeng ka Manchester United pyrshah ïa ka Sheffield United, ka jingïalehkai ka la long kaba itynnad hynrei ym pat na ka liang jong ka Manchester United kaba la ïoh ïa ka jingjop da ka said. Ha kane ka jingïakhun dei ka Man-chester kaba la khyrwit kol nyngkong lyngba u Scott McTominay ha ka minit kaba 28 hynrei tang ha ka minit kaba 34 ka Sheffield United ka la ïoh ban pynphai ïa kane ka kol ba la thep da u Oli McBurnie lyngba ka jingshut penalty.
Haba bteng ïa ka kylla miet, watla baroh ar liang ki la ïakhun tyngeh bad wad ïa ki kabu ban pynkhih jar hynrei dei tang ha ka minit kaba 77 ba u Dalot u la ïoh ban khyrwit ïa ka kol kaba ar jong ka Manchester kaba la biang pura ban khur ïa ka jingjop.
Lyngba kane ka jing-jop, ka Manchester United ka la kiew sha ka kyrdan kaba 8 na ki 15 point ba ka la khur na ki 9 tylli ki jingïalehkai, katba ka Sheffield United pat ka dang don ha trai duh ka miej ïakheiñ, hadien ba ka dang khur tang 1 point na ki 9 tylli ki jingïalehkai.
Ha kawei pat ka jing-ïalehkai, ka Chelsea kaba la khyrwit nyngkong 2 tylli ki kol lyngba u Cole Palmer ha ka minit kaba 15 ba la wan lyngba ka jingshut penalty bad u Mykhailo Mudryk ha ka minit ba 48, la i kumba kan khur ïa ka jingjop kaba paka tam na ka bynta u Mauricio Pochettino hynrei kane ka jingkmen ka la neh tang katto katne, kata hadien ba ka Arsenal ka la ïoh ban pynphai ïa ka kol kaba nyngkong lyngba u Declan Rice ha ka minit kaba 77 bad ka kol kaba ar ha ka minit ba 84 lyngba u Leandro Trossard.
Lyngba kane ka jingïakhaid ka Arsenal ka dang kamai 21 point na ki 9 tylli ki jingïalehkai bad ban don ha ka kyrdan kaba ar, katba ka Chelsea ka dang kamai 12 point na ki 9 tylli ki jingïalehkai bad ban don ha ka kyrdan kaba 10.
Ha kawei pat ka jing-ïalehkai ka Nottingham Forest ka la ïakhaid da mar 2 kol ha ka jingïakhun pyrshah ïa ka Luton, ka Newcastle ka la jop da 4-0 kol ïa ka Crystal Palace, ka Manchester City ka la jop da 2-1 kol ïa ka Brighton bad ka Brentford ka la jop da 3-0 kol ïa ka Burnley.
