Shillong, Risaw 22
Ka lympung ïalehkai phutbol ba la pynïaid da ka Tyrsad Area Sports Association (TASA) ha madan Tyrsad, kata ha ki kyrdan bapher bapher ka la ïaid shaid shaid shakhmat.
Haba phai sha ki jingïalehkai jong ka First Division ba la pynlong ha ka sngi Saitjaiñ hapdeng ka Wahlyngkien Sunei Sports Club pyrshah ïa ka Rangshangkham Sports Club ka la long kaba noh bad lah shiliang namar ka Wahlyngkien ka la pynliem kput ïa ka Rangshangkham da 7-0 kol.
Haba phai sha ka jingïakhun kaba lah shiliang, ka Wahlyngkien ka la ïoh ban khyrwit kol naphang ha kaba u Kitboklang Warjri marwei u la ïoh ban thep haduh 4 tylli ki kol kata ha ka minit ba 11, 24, 56 bad 60, u Kevinson Rynjah u la thep ha ka minit ba 26 bad Rostar Thabah ha ka minit ba 65 bad 78.
Haba phai sha ka jingïalehkai jong ka kyrdan Second Division, ka Madan Mawser Sports Club ka la lah ban pynliem noh ïa ka Wahlyngkien Ramklang Sports Club da 1-0 kol. Ïa kane ka shi kol jong ka Madan Mawser la ïoh ban khyrwit da u Hamebansan Jyrwa ha ka minit kaba 15.
Ha ka jingïalehkai ha ka Third Division pat, ka Mawteibah Sports Club ka la lah ban pynliem noh ïa ka Rangkynsai Sports Club da 4-1 kol. Ïa ki kol jong ka Mawteibah, kata ka kol ba nyngkong la ïoh ban thep hi da u Junestar Kharryngki sha la ka jong ka kol ha ka minit ba 13, katba ïa kiwei pat ki kol la thep da u Johnystar Khardewsaw ha ka minit ba 19 bad 42 bad u Nangsankupar Lyngdoh ha ka minit ba 52, katba ïa ka shi kol jong ka Rangkynsai pat la ïoh ban thep da u Ebarborn Jala ha ka minit ba 13.
Ki jingïalehkai ban wan jong kane ka lympung, kin long ne bteng biang pat ha ka 23 tarik u Risaw, kata ka jingïakhun ha ka First Division kan long hapdeng ka Pyndenumbri Sports Club pyrshah ïa ka Umkaber Sports Club ha ka por 3 baje janmiet, ha ka Second Division pat ka Thainthynroh Sports Club kan ïakhun pyrshah ïa ka Pompyrthat Sports Club ha ka por 1.30 mynsngi bad ha ka Third Division pat ka Phanbhur Sports Club kan ïakhun pyrshah ïa ka Dewiep Sports Club ha ka por 12 baje mynsngi.
