Paris, Risaw:
Ka tnat Syntiat jong ka France ha kane ka kynti ka la ong ba ka jingbthei jong ka hospital hapoh Gaza kam dei ka jingleh jong ka Israel bad ia kane la lap katkum ka jingbuddien bad jingwad bniah jong ka tnat syntiat DRM. Hynrei la ong ba kito ki ‘namding kiba la leit hap bad bthei ha katei ka hospital ha Gaza, ki dei hi ki ‘namding jong ki lehnoh na Palestine bad uba la leit bakla hap hapoh u pud-u sam jongki hapdeng ka jingiakhun bad ki shipai ka Israel.
Ki heh ka Palestine ki la iathuh ba ki don kumba 471 ngut eiei ki briew kiba la khlad noh ha ka jingshah ther bom ka hospital Al-Ahli al-Arabi hapoh Gaza, ha kaba ki lehnoh Hamas bad ka Palestine, ki la kynnoh ba dei beit ki ‘namding jong ka Israel kiba la leit hap bad bthei ha katei ka hospital ha ka Sngi Ba-ar. Katba na ka liang jong ka Israel, ka la kyntait bad ong ba kam shym la siat ne ther bom sha ki jaka ba don ki riew paidbah khamtam sha katei ka thaiñ ba don katei ka hospital.
Kumta, ruh ka France ha kane ka por ka la pynksan bad pynshisha ba katei ka jingther bom ia katei ka hospital ha Gaza, kam dei ka jingleh jong ka Israel hynrei ka dei ka jingbakla jong ki lehnoh ka Palestine hi katba ki dang ther ‘namding ha ka jingiakhun pyrshah ia ki shipai ka Israel.
Namar la ong ba katkum ka kaiphod ba la ioh lum ha ka Sngi Palei, la shem ba ka Israel kam shym don bynta ha katei ka jingleit pynbthei bom ia katei ka jaka sumar kaba don hapoh Gaza, ha kaba 300 ngut eiei ki riew paidbah naduh ki nongthiah pang, ki bahaiing jong kiba thiah pang bad kumjuh ruh ki nongtrei ha katei ka hospital ki la duh noh la ka jingim ha katei ka jingjia.
