Shillong, Risaw 22
Ka kynhun ïalehkai kriket jong ka Meghalaya kan sa mih ban leit ïashim bynta ha ka lympung BCCI Men’s U-23 State A Trophy ka ban long ha Chandigarh naduh ka 28 tarik mynta u bnai.
Ïa kane ka kynhun la kitbok kitrwiang da ki nongïalam ka Meghalaya Cricket Association ha ka jingïalang kaba la long ha ka sngi Saitjaiñ ha madan Polo.
Na ka liang jong ka BCCI ka la pyntip ba la pynkylla ïa ka bynta ba ïadei bad ka rta jong ki nongïalehkai, naba ha ki snem ba la leit, ka dei ka U-25.
Haba ai jingkren ha ka jingïalang ba la long ha madan MCA ha Polo, kata hadien ba la dep ban kilan met, na ka liang u President ka MCA u Naba Bhattacharjee u la pynkynmaw ïa ki rangïalehkai ba ki dei ban phai khmat bad don ka thong sha ka lawei lyngba kane ka jingïalehkai.
“Mynta phi la don ha ka bynta kaba kongsan bha ha ka jingim ïalehkai kriket ka jong phi, naba phi don ha ka rta kaba hapoh ka 23 snem bad ban ïakhun ban ïoh rung pat sha ka Senior Team,” u la ong bad bynrap ba ka la don ka jingïakhun kaba khraw bha na ka bynta ban ïoh buh jaka ha ka thup jong ki rangïalehkai bad kane ka long shisha kaba itynnad ban ïohi, kata ïa ka mynsiem ïakhun jong ki rangïalehkai.
“Mynta, ngin peit ba napdeng jong phi, haduh katno ngut kiba la long kiba la khreh ban shim ne buh ïa ka jaka ha ka senior team. Phin hap ban long ki nongrah jingshai jong ka association ka jong ngi, kumta phi dei ban aiti lut met bad mynsiem ha kane ka jingïakhun, naba baroh naphi, mynta phi la long kiba la khreh bad dep ban pyntbit ïa lade,” u la ong.
Kane ka dei ka por kaba kongsan bha na ka bynta ki rangïalehkai ba dang khynnah ban sngewthuh ba kano ka bynta jong ka jingïalehkai kriket ka ban biang eh ïa ki, la kaba bun over ne khyndiat over, kata kin don kiba tbit ha ka bol lieh bad kin don ruh ha ka bol saw bad kin don ruh kiba kwah ban ïakhun baroh hynrei ym baroh ki ban lah,” la ong u Bhattacharjee.
Ha kawei pat ka liang, u MCA Honorary Secretary Bah Gideon Kharkongor u la ban halor ka jingdonkam ban don ïa ka akor ka burom, da kaba ong ba kane ka long kaba donkam kum ka sap kaba phi don.
Kiwei kiba la ïadon lang ha kane ka sngi, ki long u Honorary Treasurer Dhrubajyoti Thakuria bad u Apex Council Member Bah Peter Macdonald Kharsawian lem bad kiwei kiwei.
Ha kane ka lympung, ka Meghalaya kan ïalehkai haduh hynriew tylli ki jingïalehkai, ki ban long baroh ha Chandigarh. Ki jylla ban ïakhun pyrshah ki long ka Uttar Pradesh, Rajasthan, Assam, Andhra Pradesh, Bengal bad ka Railways.
Ka jingkilan met jong kane ka kynhun kaba la sdang naduh ka 15 tarik mynta u bnai, kan sa kut noh ha ka 24 tarik bad ha kaba ka kynhun kan sa mih pat na nongbah ban hiar sha Chandigarh ha ka sngi kaba bud.
Ki thup kyrteng jong ka Meghalaya ki long u Abhishek Gupta, Nishanta Chakravarty, Manish Sharma, Md Asif Khan, PM Santhosh, Aaron A Nongrum, Badonnam J Mylliemngap, Joydee-pan Deb, Sudhir Sahani, Kevin Sanjeev Christopher, Raghav Magotra, Agreas Chamcham A Sangma, Aryan Borah, Sachin Kumar bad u Appante Waldora A Sangma.
Ki Support staff pat ki long u Neetesh Sharma (head coach), Synrapsing Riatham (assistant coach), Skhembor Khongbtep (trainer), Emidao Dhar (physio), Wonderful Pakyntein (manager).
Ka Meghalaya kan ïakhun nyngkong eh ïa ka Uttar Pradesh ha ka 28 tarik Risaw, 30 tarik pyrshah ïa ka Rajasthan, 1 tarik Naiwieng pyrshah ïa ka Assam, 5 tarik Naiwieng pyrshah ïa ka Andhra Pradesh, 7 tarik Naiwieng pyrshah ïa ka Bengal bad 9 tarik Naiwieng pyrshah ïa ka Railways.
