Washington, Risaw:
Ki katto katne ki heh jong ka United States ki la ai ksai ba ka US ka lah ban phah biang noh ia 2 tylli ki ‘Iron Dome’ (Missile Defence System) ba ka dang shu ioh thied shen na ka Israel, khnang ba ka Israel kan ioh ban iada ialade na ki ‘namding ba la ther da ki lehnoh ha kine ki sngi ban wan.
La ong ba ka tnat iada jong ka US ka la pynsngew ia kane ka khubor sha ki Myntri jong ka Congress ha ka jingai jingkren ruh ha ka jingialang bad ki lad pathai khubor ha ka Sngi Balang. Kumta la shim ia ka rai ban phah kylla da kitei ki tiar ban iada na ki ‘namding ba la ju tip kum ki ‘Iron Dome’, kum shi bynta ban ai jingkyrshan ia ka Israel hapdeng ka jingiakhun pyrshah ia ki lehnoh Hamas bad kiwei lehnoh kiba thmu ban ai jingkyrshan ia ka Hamas.
Ia kitei ki tiar iada ‘Iron Dome’ la shna da ka tnat Rafael Advanced Defence Systems ha kaba la ai jingkyrshan da ka US, kum shi bynta ban iada na ki ‘namding kiba wan poi nalor suiñ jong ka Lebanon bad kiba ju siat pynbthei da ki lehnoh Lebanon sha ki shnong ka Israel kaba la jia ha u snem 2006 ha ka jingiakhun thma jong ki lehnoh Hezbollah.
Ha u Nailar jong u snem 2022, ka Israel ka la pynbna ba kitei ki tiar iada ‘Iron Dome’ ki long 97% ka jingkhlaiñ ban lah ban iada na ki ‘namding kiba wan poi nalor suiñ bad kiba la siat da ki lehnoh na ki ri ba marjan.
