Cairo, Risaw:
Katkum ki khubor, la ong ba ki trok kiba leit kit ia ki mar bam ban pynpoi sha Gaza, ki la leit poi sha khappud Rafah ban iaid lyngba ka Egypt ha ka Sngi Saitjaiñ khnang ban pynpoi pat sha Gaza lyngba kane ka ri.
Ki lad pathai khubor jong ka Egypt ha katei ka sngi, ki la pyni ia kitei ki trok kiba la leit rung na ka khyrdop khappud ban ioh leit pynpoi ïa ki mar sha Gaza.
Watla ka Israel ka la ther bom khlem sangeh bad ka la pynhiar kput da kaba ther ‘namding kput sha Gaza namar ka jingbitar ia ka jingleh jong ki lehnoh Hamas, hynrei hadien ba la iakren bad ka United States pat, ka Israel ka la mynjur ban ailad ia ka jingpynpoi ia ki mar bam bad ki jingdonkam na ka bynta ki paidbah nongshong shnong ka Gaza.
Ka kynhun lehnoh Hamas ka la sdang ban leit hiar thma ia ka Israel ha ka 7 tarik jong une u Risaw bad ha ka sngi ba bud, ka Israel ka la pynbna ia ka thma pyrshah ia kitei ki lehnoh Hamas bad naduh katei ka sngi hi, ka la pynhiar kput bad ther bom dusmon sha kylleng ki bynta jong ka Gaza ba ju don ki ktem jong kitei ki lehnoh ka Palestine.
