Hyderabad, Risaw
Ka seng Telangana Jana Samiti (TJS) ka la pynbna paidbah halor ka jingïatreilang jong ka bad ka seng Congress na ka bynta ka ilekshon Telangana State Legislative Assembly (TSLA) ka ban sa long ha ka 30 tarik, Naiwieng.
U President jong ka seng TJS, u Professor Kodandaram, u la ïakynduh ïa u President barim jong ka All India Congress Committee (AICC) u Rahul Gandhi ha V Park kaba don ha Karimnagar ha ka Sngi Thohdieng, ha kaba u la pynpaw ïa ka mon ban ïatreilang na ka bynta ka jingïakhun ïa ka ilekshon TSLA bad ka seng Congress.
Ha ka por ba la don ka jingïalang, u Professor Kodandaram bad u Rahul Gandhi ki la ïamir jingmut ha kaba ïadei bad ka jingthmu ban jynrat noh ïa ka seng BRS kaba bat ïa ka jingsynshar ha ka jylla.
Ki la thmu ruh ban buh sa kawei ka jingïalang bad ki nongïalam jong ka seng Congress na ka bynta ban ai ïa ka rai bakhatduh ha kaba ïadei bad ka jingbhah ïa ki konstitwensi, ha kaba ïa ki jingtip kiba bniah yn sa ai hadien ka jingïakren bad ki heh nongïalam jong ka seng Congress ha ka jylla.
