Shillong, Risaw 22
Ka India ka la bteng ban khur ïa ka jingjop ha ka lympung ICC World Cup kaba dang ïaid shakhmat mynta bad kane ka la wan hadien ba ka la lah ban pynliem noh ïa ka New Zealand da 4 wiket ha ka jingïalehkai kaba la long ha ka Sngi U Blei ha HPCA Stadium.
Ka India kumba ka long mynta kam pat shah rem satia ha kane ka lympung, ha kaba na ki 5 tylli ki jingïalehkai, ka la jop baroh san tylli bad ban kiew syndon hakhliehduh jong ka miej ïakheiñ dor-thong (point), kata ban khur 10 point na ki 5 tylli ki jingïalehkai.
Haba phai sha ka jingïalehkai, ka New Zealand kaba la tied nyng-kong hadien ba ka la shah rem noh ha ka jingkynting pisa, ka la lah ban kamai 273 run bad hap lut baroh ki wiket na ki 50 over. U Daryl Mitchell marwei u la tied haduh 130 run na ki 127 bol katba u Rachin Ravindra u la tied 75 run na ki 87 tylli bol, kaba la lah ban kyntiew ïa katei ka jingkamai run ka New Zealand.
Kane ka jingjop jong ka India ka la wan lyngba ka jinglah ban tied bha jong u Virat Kohli uba la tied marwei haduh 95 run na ki 104 tylli ki bol, u Rohit Sharma uba la tied 46 run na ki 40 tylli ki bol bad u Ravindra Jadeja uba la tied 39 run na ki 44 tylli ki bol.
Katba u Mohammed Shami pat u la ïoh ban khur haduh 5 wiket ha kane ka jingïalehkai, kaba la lah ban tehlakam ïa ka New Zealand ba kan kamai tang 273 run.
