Jowai, Risaw 22
Ka Nangbah Mulang ka la khur jingjop ha ka jingïalehkai jong ka lympung Super Division Kiang Nangbah Memorial Trophy 2023, katba ka Moosalyngkat pat ka la khur jingjop ha ka First Division jong ka lympung Chatister Khar-kongor Memorial Trophy 2023.
Ïa kine ki lympung ïalehkai la pynïaid da ka West Jaiñtia District Sports Association (WJDSA) ha madan Kiang Nangbah Stadium Ladthadlaboh, Jowai ha ka sngi Saitjaiñ.
Haba phai sha ka jingïakhun ha ka Super Division, ka Nangbah Mulang Sports Club ka la lah ban pynliem noh ïa ka Mynthong Sports Club da 3-1 kol.
Ha kane ka jingïakhun, dei ka Mynthong kaba la ïoh ban pynkhih jar nyngkong ha ka minit kaba 15 ba la ïoh ban thep da u Pynkhreh Talang bad kane ka shi kol ka la neh haduh ba kut ka kylla step.
Haba bteng ïa ka kylla miet pat, ka Nangbah Mulang ka la ïoh ban pyntam syndon da ar kol ha ka minit kaba 49 bad 85 ïa kaba la thep da u Albert Lyngdoh bad ha ka minit kaba 62, u Soki Lamare u la ïoh ban khyrwit ïa ka kol kaba lai.
Haba phai pat sha ka jingïakhun ha ka kyrdan First Division, ka Moosalyngkat Sports Club ka la lah ban pynliem noh ïa ka Khlieh-iongriang Sports Club da 1-0 kol.
Haba phai sha ka jingïakhun, ka la long kaba ïakhaid bha bad dei hashwa ban kut noh ka kylla miet ba ka Moosalyngkat ka la ïoh ban thep ïa ka shi kol lyngba u Edious L Laloo ha ka minit ba 90+2.
Ki jingïalehkai ban bteng pat kin long ha ka 23 tarik Risaw, haba phai sha ka jingïakhun First Division kan long hapdeng ka Dulong Sports Club pyrshah ïa ka Luti Tuber Sports Club ha ka por 12.00 baje mynsngi.
Katba ha ka Super Division pat ka jingïakhun kan long hapdeng ka Mukhla Raij Sports Club pyrshah ïa ka Lumiawmushai Shangpung Sports Club ha ka por 2.30 nohphai sngi.
