New Delhi, Risaw:
Ki shipai ïada khappud ne Border Security Force (BSF) ki la pynpaw ka jingpyrshah jur ïa ki shipai ka Pakistan namar ka jingsiat beaiñ ha ki bynta khappud jong ka India-Pakistan ha Jammu, la ïathuh ki heh shipai ha ka Sngi Thohdieng.
Kane ka jingjia ka la pynlong ïa arngut ki shipai BSF ba kin mynsaw, la ïathuh ka tyllong khubor. Ka jingshah siat ha ki shipai ka Pakistan ka la jia ha ka jaka treikam kaba don ha ka jaka khappud ha Vikram kaba don ha Arnia Sector ha Jammu.
Kumba la ïathuh ka tyllong khubor ha kaba ïadei bad kane ka bynta, la ong ba la pyndonkam da u Sniper na ka bynta ban thmu thombor ïa ki shipai BSF na ka jaka treikam ba mar pyrshah jong ki shipai ka Pakistan jong ka Khannor bad Iqbal. Ki shipai BSFki la bunkam ha ka ban trei ïa ka kam shna ilektrik ha katei ka jaka treikam haba la jia kane ka jingshah siat.
Ki shipai BSF ki la rah ïa kane ka mat na ka bynta ban ïakren bad ki heh nongïalam jong ki shipai ka Pakistan ha ka jingïalang ba la pynlong hapdeng kine ki ri ha ka jaka treikam kaba don ha u International Border (IB) ha RS Pura Sector ha ka sngi Palei janmiet.
Ha ka por ba la don ka jingïalang, ki shipai BSF ki la wanrah ruh ïa ka mat ïakren ha kaba ïadei bad ka jingjur jong ki kam khaïi tuh ïa ki jingdih pynbuaid na ki bynta khappud bad ong ïa ka kynhun shipai ka la don ïa ki sakhi ban pynshisha halor kine ki jingjia, la bynrap ka tyllong khubor.
Ki shipai BSF ki la ong ba ki shipai Pakistan ki la pynshisha ba kim donkti halor kine kiei kiei baroh. Ka India bad ka Pakistan ki la ïasoi ïa ka soskular sangeh ïasiat ha u Rymphang jong u snem 2021. Kum shi bynta jong ka jingïateh soskular, baroh ar tylli ki ri ki la mynjur ban bud pyrkhing bha halor ki kyndon ba ïadei bad ki jingsiat beaiñ ha ki bynta jong u Line of Control (LoC) ha Jammu & Kashmir bad ha kiwei pat ki Sector.
