Washington, Risaw:
Kawei ka nongthoh khubor kaba dei shiteng ka Russia-America bad kaba trei ha ka Radio Free Europe/ Radio Liberty, ka la shah bat noh ha ka Russia bad shah kynnoh ba kam shym la rejistar ne pynithuh ialade kum ka nongwei ‘Foreign Agent’ hapoh jong katei ka ri.
Ia katei ka briew la ithuh kum ka Alsu Kurmasheva, kaba long ruh ka ‘Editor’ jong ka Tatar-Bashkir bad kumta la ong ba ka long kaba kongsan ban ioh pyllait noh ia ka ha ka por kaba biang khnang ba kan lah ban leit phai biang noh sha la iing.
Ka Kurmasheva, ka long ka nongthoh khubor kaba ar ba kan shah kem ha ka Russia. Hadien jong u Evan Gershkovich, uba long u nongthoh khubor jong ka Wall Street Journal, uba la shah bat ha ka Russia naduh u bnai Lber halor ka jing pharep jong ka Russia ba utei u nongthoh khubor u long u nong syntiat ba la phah da ka US ban leit syntiat sha Russia.
Ka Kurmasheva ka shong ka sah ha Czech Republic jong ka nongbah Prague, hynrei ka la leit rung sha Russia ha ka 20 tarik jong u bnai Jymmang naka bynta ki kam ba kyrkieh ha iing- ha sem.
Hynrei, ka la shah bat noh ha ki bor pyniaid jong ka Kad liengsuiñ ha Kazan naduh ka 2 tarik u Jylliew hashwa ba kan leit phai noh sha ka liengsuiñ jongka, ha kaba ka la shah bat bad la kurup noh ia ki jingdon jing-em jongka, naba la kynnoh ba kam shym la rejistar ne pynbiang ia ki kot- ki sla ban pynithuh ba ka long ka riew nongwei. Kumta, ki bor pyniaid ka US ki la ong ba ka kam thoh khubor kam long ka kam sniew ne ka kam pynkheiñ aiñ. Ym don kano- kano ruh ka ri kaba lah ban bat ne ban pynshitom ia ki nongthoh khubor khlem ka daw kaba biang.
