Bhubaneswar, Risaw:
Ka kynhun synrop jong ka liang pyrshah ba la tip kum ka INDIA kan sa pynlong ïa ki jingïakhih ha Rayagada bad ha Balasore ha u bnai ban wan pyrshah ïa ka sorkar NDA hapoh ka jingïalam jong ka seng BJP kum ka sorkar kmie bad ban pynrem jur ïa ka seng BJD ha ka jylla halor ka jingbymlah jong ka ban leh ei ei ha kaba ïadei bad ki jingpynurlong ïa ki jingkular ba la khlei sha ki paidbah jong ka Odisha, la ong u nongïalam jong ka seng Congress ha ka Sngi Saitjaiñ.
Ka jingïalang jong baroh ki kynhun kiba pyrshah ïa ka seng BJD bad BJP kan sa long ha Bhubaneswar ha ka Sngi Thohdieng jong ka taïew na ka bynta ban rai ha ka ban pynlong ïa ki jingïaid paidbah, la ong u President jong ka Odisha Pradesh Congress Committee (OPCC) u Sarat Pattanayak. ‘Ka sorkar jong u Naveen Patnaik ha ka jylla bad ka sorkar kmie kim shym la lah ban leh ei ei ha ka ban pynurlong ïa ki jingkular ba ki la khlei sha ki paidbah ha Odisha.
“Baroh ar tylli ki seng kata ka seng BJD bad ka BJP ki la shu buh tang ki jingkular kai. Ngin sa pynlong ïa ki ‘Janakrosh’ Rally ha Rayagada bad Balasore ha ka 8 tarik, Naiwieng bad ha ka 15 tarik, Naiwieng,” la ong u Pattanayak ha ka jingïakren bad ki nongthoh khubor.
U President jong ka OPCC u la ong ba ka kynhun INDIA kan sa pynlong ïa ki jingïakhih ha kiwei pat ki bynta jong ka jylla ha kine ki sngi ban sa wan.
“Kumba la sakhi, la ïohi ba ki briew jong ka Odisha ki la ïakhun na ka bynta ban ïoh ïa ka umbam-umdih nalor ba ki la ïakynduh jingeh lypa na ka jingduna ki doktor ban ai jingsumar ha ki Hospital bad kumjuh halor ka jingbun jong ki jingpynïap hi jong ki nongrep,” la ong u nongïalam jong ka seng Congress.
U la pynshisha ruh da kaba ong ba ka sorkar NDA hapoh ka jingïalam jong ka seng BJP ha ka sorkar kmie kam shym la lah ban leh ei ei na ka bynta ban pynurlong ïa ki jingkular ban pynbiang kam sha ki samla.
Ka sorkar kmie kam lah ban tehlakam ïa ka jingkiewdor jong ki mar ba bun kiba la ktah ïa ki paidbah, la bynrap u Pattanayak.
