Hyderabad, Risaw:
U heh nongïalam jong ka seng Congress u Rahul Gandhi u la kular ban pynlong ïa ka jingwad khana samari halor ka jingdon ki kynhun jait bynriew ha ka thaiñ Telangana jong ka ri lada ka seng jong u ka wan ha ka bor synshar.
U Gandhi u la batai shai da kaba ong ba ka “X-ray jong ka ri ” kan sa batai haduh katno ka spah jong ka longïing jong u President jong ka seng Bharat Rashtra Samithi bad u Mytnri Rangbah jong ka jylla u K Chandrashekar Rao ka la long lyngba ka jinglute na Telangana.
U Gandhi u la kynnoh ruh ba ka seng BRS kaba bat ïa ka jingsynshar ka la klun ïa ki jaka jong ki baduk bad kim lah satia ban pyntreikam ïa ki skhim kiba ai jingmyntoi ïa ki paidbah.
Ha kaba ïadei bad ka jingbatai shai halor ka jingwad khana samari kaba long kum ka X-ray ïa ka ri, u MP jong ka seng Congress ha ki khyndiat sngi jong ka taïew ba la lah u la kular ban pynlong ïa ka jingkhmih bniah ha Telangana lada ba ka seng jong u ka ïoh ïa ka bor synshar.
Ha ka jingai jingkren ha ka jingïalang paidbah kaba heh ha Bhupalpally distrik ha ka sngi kaba ar ba la pynlong ïa ka Yatra ha ka jylla ka ban pynlong ïa ka ilekshon, u Gandhi u la ong ba ka jingwad khana samari halor ka jingdon jong ki kynhun jait bynriew kan sa pynpaw haduh katno ka longïing jong u Rao ka la leh ïa ki kam lute ha Telangana.
“Ym don mano mano ruh ba tip ba shano ka spah jong ka ri ka leit naba ki kynhun kiba wan na ki longïing ki baduk ki shu duk sah. Tang ka jingwad khana samari ka ban lah ban pynpaw ïa baroh kiei kiei jong ki kynhun jait bynriew bapher bapher ha kaba kane kan sa long tad haduh ba ka seng kan ïoh ban thaw sorkar.
