Washington, Risaw:
Lai ngut ki briew , kita u Alfred Chestnut, Ransom Watkins bad u Andrew Stewart, kiba la shah kem noh naduh ka por ba ki dang don 16 snem ka rta ha ka sngi ‘Thanksgiving Day 1983’ bad shah pynngat kyndon halor ka jingshah pharep don kti ha ka jingpynïap ïa u DeWitt Duckett, 14. Bad baroh ki la shah pynngat kyndon pynkheiñ aiñ bad shah rai ruh ban set patok baroh shi jïingim.
Hynrei la ong ba mynta hadien 36 snem ba la set patok ïa ki, la pynbna ba kine 3 ngut kim shym la don bynta ne don kti eiei ha katei ka kam pynïap briew ba la pharep pyrshah ïa ki naduh kitei ki phew snem ba la leit. Kumta ruh ka ïingbishar ka la rai ban sam ïa kitei ki 3 ngut haduh $48 Million hadien ba la ioh ïa ka jingmynjur na ki bor pynïaid ka Balimore City Board of Estimates ha kane ka taïew ba la leit.
Ka Baltimore Police Department ha katei ka taiew ba la lah, shuwa ban rai halor katei ka jingsiew kaba khraw halor ka jingshah pharep bakla jong ki, ka la ong ba kine ki 3 ngut kiba la shah set patok bad shah kem naduh ka rta ba ki dang long tang ki khynnah kiba hapoh 18 snem ka rta, ki la lait noh pat ha kane ka por kum ki paieid- samla lane tymmen- samla kumba ju ïa khot.
Kitei 3 ngut ki la ioh ruh ïa ka jingsiew ba $2.9 Million na ka tnat na Maryland ha u snem 2020 halor ka jingshah pharep bakla jongki bad ka jinghap ban mad ïa ka jingim ba syllang hapoh patok.
La ong ba kine ki 3 ngut ki rangbah, ki la ioh lait noh bad ki la shah weng noh na kitei ki kyndon pynkheiñ aiñ ba la pynngat ha ki, hadien ba ki pulit ki la lap ïa ki sabut ba shisha jong kiba don kti ha katei ka kam pynïap briew ha kitei ki phew snem ba la leit bad kumta ruh la pynshisha ba kine ki 3 ngut ki long ki lui-lui ki bym don dak ne don kti eiei ha katei ka kam pynïap briew kumba la pharep ïa ki baroh shi katta.
Hynrei, kaba sngewsih ka long ba utei u runar uba pynïap shisha ïa utei u briew, uba la ithuh kum u John Doe, u la dep khlad naduh ki khyndïat snem ba la leit, hashwa ban pyllait noh ïa kitei ki 3 ngut.
Ha ka 25 tarik u Naiwieng jong u snem 2019, hashwa jong katei ka ‘Thanksgiving Day’, u nongbishar ka US, u la phah pyllait mardor ïa ki halor ka jïingshisha bad ki sabut ba la ioh lum ba kitei ki 3 ngut kim shim la don kti eiei ha katei ka kam pynïap briew ba la pharep pyrshah ïa ki baroh shi katta.
Kumta, ha kane ka por ka ïingbishar ka la rai ban siew noh da katei ka pisa sngewlem halor ka jingshah pharep beiñ jongki baroh shi katta, bad ka ïingbishar ka la ong ruh ba ym don kaei-kaei ruh ha ka pyrthei ka ban kham ktah ïa ka jïingmut jingpyrkhat jong kitei ki 3 ngut bad ki bahaïing- hasem jongki ha kitei ki phew snem ba la set patok ïa ki naka bynta jong kiwei pat ki nongleh sniew. Bad la ong ruh ba ym don ka dor ka ban lah ban siew noh ïa kitei ki phew snem ba kitei ki 3 ngut bad ki bahaïing- hasem jongki ki la ïai shah slem bad mad ïa ka jingeh bad jingjynjar. Hynrei kane ka jïingai sngewbha ha kane ka por ka long tang ban sngewlem ïa ka jingshah pharep be-aiñ bad ka jingshah set patok bakla ïa ki ha baroh shi katta ki phew snem ba la leit.
