Shillong, Risaw 23
Ka Meghalaya ka la bteng ban mad ïa ki nam rem ha ka lympung Syed Mushtaq Ali Trophy T20 kaba dang ïaid shakhmat mynta, bad kane ka la wan hadien ba shah pynliem sa ha ka Jammu and Kashmir.
Kumba ka long mynta, ka Meghalaya ha kane ka lympung ka la shah rem lut baroh ki jingïalehkai kiba ka la dep ban ïakhun haduh mynta.
Ka Meghalaya ha kane ka jingïakhun pyrshah ïa ka Jammu and Kashmir kaba la long ha ka sngi Nyngkong ka taïew ha Jaipur ka la shah pynliem noh da phra wiket.
Haba phai sha ka jingïalehkai, hadien ba ka la jop ïa ka jingkynting pisa, ka Meghalaya ka la kam trai ban tied nyngkong ha kaba ka la kamai 104 run na ki 20 over bad hap haduh 7 wiket.
Haba phai sha ka jingïalehkai, ka Meghalaya ka la sdang ha ka rukom kaba biang, ha kaba u ‘guest player’ u Nakul Verma bad u Sylvester Mylliempdah ki la lah ban tied lang haduh 53 run na ka bynta ka wiket kaba nyngkong, kaba dei ruh kaba heh tam ba ka kynhun ka la lah ban tied ha kane ka aiom. U Verma u la tied 37 run na ki 47 tylli ki bol bad u Mylliempdah u la tied 26 run na ki 32 tylli ki bol. U Lerry Sangma uba la wan hadien u la tied 24 run na ki 25 tylli ki bol.
Hynrei kine bad kiwei ki nongtied kim shym la lah ban kamai run sted bad dei tang u Amiangshu Sen uba la tied 10 run na ki 9 tylli ki bol.
Haba beh ïa kane ka thong, ki nongtied ka Jammu and Kashmir ki la lah ban kot tang ha ka over kaba 15 bad duh tang 2 wiket. U Kilco Marak u la khur shi wiket bad ai 17 run na ki 2 over bad u guest player Rajesh Bishnoi u la khur shi wiket bad ai 28 run na ki 4 over.
Hadien kane ka jingshah rem, mynta pat ka Meghalaya kan pynkhreh ban ïakhun pyrshah sa ïa ka Haryana ka ban long ha ka sngi Balang.
Ha kawei pat ka khubor, ka Meghalaya lashai ka sngi kan ïakhun pyrshah ïa ka Bengal ha ka lympung Senior Women’s T20 Trophy.
Lah ban pynkynmaw ba hynnin ka sngi, ka Meghalaya ka la shah rem noh ha ka Tamil Nadu da 123 run. Watla ka Sandria Momin kaba la khur 2 wiket bad ka Rubi Chettri ka la khur shi wiket hynrei ka Tamil Nadu ka la lah ban tied haduh 143 run bad hap 4 wiket na ki 20 over bad ki la lah pat ban pynhap lut ki wiket jong ka Meghalaya kiba la kamai tang 20 run na ki 13.2 over.
