Shillong, Risaw 23
Ka Afghanistan ka la thaw ïa ka khana pateng ne history hadien ba ka la lah ban pynliem noh ïa ka Pakistan ha ka sien kaba nyngkong ha ka lympung World Cup 2023 kaba dang ïaid shakhmat mynta.
Lah ban pynkynmaw ba ka Afghanistan dang ha ka taïew ba la dep, ka la lah ban pynliem noh ïa ka England bad mynta sa ïa ka Pakistan.
Haba phai sha ka jing-ïalehkai, ka Pakistan kaba la tied nyngkong ka la kamai 282 run na ki 50 over bad hap 7 wiket. Kane ka thong wat la ka dei kaba heh pynban kam shym la pynduh jingkyrmen naba ki nongtied ka Afghanistan ki la lah ban kot ha ka over 49 bad hap tang 2 wiket.
Hadien ka jingsdang da ka jingjop ha ki ar tylli ki jingïalehkai, ka Pakistan mynta ka la shah rem ha ki ar tylli ki jingïakhun pyrshah ïa ka India bad Australia bad mynta sa ha ka Afghanistan. Kumta ka jingïalehkai ka ban wan ruh kam long satia kaba suk naba kan hap ban ïakhun pyrshah ïa ka South Africa. Katba ka jingïalehkai ba bud ïa ka Afghanistan kan long hadien shi taiew pyrshah ïa ka Sri Lanka bad kumba long mynta, ka Afghanistan ka la lah ban phohsniew ban kiew shajrong ha ka miej kheiñ dor-thong.
