Bhopal, Risaw:
U heh nongïalam jong ka seng BJP bad u Myntri barim jong ka Madhya Pradesh u Rustam Singh uba la 78 snem ka rta u la iehnoh kam na ka seng hynnin ka sngi, hashwa ban pynlong ïa ka ilekshon Assembly ha u bnai ban wan.
Ha ka shithi iehnoh-kam ba la phah sha u President jong ka seng BJP ha ka jylla u Vishnu Dutt Sharma, u Singh u la ong ba u la iehnoh kam na ka kynhun nongïalam jong ka seng BJP bad na baroh ki kam jong ka seng.
U la ong ba um shym la shah ñiewkor ha ka seng, la ong ka tyllong khubor kumba la ïathuh da u Singh.
U khun jong u Rustam Singh, u Rakesh Singh u la shah pynbna kyrteng ban ïakhun ha ka ilekhon ha ka seng Bahujan Samaj Party na Morena konstitwensi. Naduh kane ka por, ka la don ka jingsuba ba u Rustam Singh u lah ban iehnoh ïa ka seng BJP bad ban leit ïalap ilekshon na ka bynta u khun jong u ha Morena.
U nongïalam jong ka kynhun ki Gurjar na ka thaiñ Gwalior-Chambal, u Rustam Singh u la iehnoh ïa ka kam Indian Police Service (IPS) ha u snem 2003 bad leit ban pynïasoh bad ka seng BJP.
U la long u MLA la ar sien, naduh u snem 2003-2008 bad 2013-2018. U Rustam Singh u la bat ïa ka kam kum u Myntri na ka bynta ar samoi kata naduh u snem 2003-2008 bad 2015-2018.
Ka ilekshon ban jied ïa ki 230 ngut ki dkhot jong ka ïingdorbar kan sa long ha ka 17 tarik, Naiwieng.
