Shillong, Risaw 23
Ka lympung ïalehkai phutbol ba la pynïaid da ka Tyrsad Area Sports Association (TASA) ha madan Tyrsad ha ki kyrdan bapher bapher ka la ïaid shaid shaid shakhmat.
Haba phai sha ki jingïalehkai ba la pynlong ha ka sngi Nyngkong, ki jingïakhun ha ka First bad Second Division ki la kut ha ka jingïakhaid ha kaba ki club ki la hap ban shu hun noh ïa ka jingïasam mar shi dor-thong.
Haba phai sha ka jingïakhun ha ka First Division, ka jingïakhun ka la long hapdeng ka Pyndenumbri Sports Club pyrshah ïa ka Umkaber Sports Club, ha kaba ka jingïalehkai ka la long kaba itynnad bad kaba ïakhaid bha bad watla na ki arliang mamla ki la ïakhun tyngeh hynrei kim shym la lah satia ban ïoh pynkhih jar bad ha kaba kut ki la hap ban shu hun noh ban sam mar shi dor-thong.
Haba phai sha ka jingïalehkai ha ka kyrdan Second Division ruh, kata ka jingïakhun hapdeng ka Pom-pyrthat Sports Club pyrshah ïa ka Thainthynroh Sports Club ka la kut noh ha ka jingïakhaid khlem da don ba lah pynkhih jar haduh kaba kut.
Ha ka jingïalehkai ha ka Third Division pat, ka Dewiep Sports Club ka la lah ban pynliem noh ïa ka Phanbhur Sports Club da 1-0 kol. Ïa kane ka kol jong ka Dewiep, la ïoh ban thep Feddyson Kharshandi ha ka minit kaba 20 kaba la biang pura ban pynïoh 3 dor-thong ïa la ka jong ka kynhun.
Ki jingïalehkai ban wan jong kane ka lympung, kin long ne bteng biang pat ha ka 26 tarik u Risaw, kata ka jingïakhun ha ka Third Division kan long hapdeng ka Lawkhla Sports Club pyrshah ïa ka Wahnongkseh Sports Club ha ka por 1 baje mynsngi, ha ka Second Division pat ka Perkseh Sports Club kan ïakhun pyrshah ïa ka Laitma-whing Sports Club ha ka por 3 baje janmiet.
