Jowai, Risaw 23
Ka Dulong Sports Club ka la pynliem noh ïa ka Luti Tuber Ialong Sports Club ha ka jingïakhun jong ka lympung First Division Football Tournament- Chatister Kharkongor Memorial Trophy 2023, katba ka Mukhla Raij ka la pynliem noh ïa ka Shangpung Lumiawmushai Sports Club ha ka Super Division Football Tournament Kiang Nangbah Memorial Trophy 2023.
Ïa kine lympung ïalehkai la pynïaid da ka West Jaiñtia District Sports Association (WJDSA) ha madan Kiang Nangbah Stadium Ladthadlaboh, Jowai ha ka Lah Sngi U Blei mynta ka taiew.
Haba phai sha ka jingïakhun jong ka First Division, ka Dulong SC ka la pynliem noh ïa ka Luti Tuber Ialong SC da 2-0 kol bad ïa kine ki kol la ïoh ban thep da u Sahanu Lyngdoh ha ka minit kaba 25 bad u Baiahunlang Dhar (own goal) ha ka minit kaba 47.
Ha ka jingïakhun jong ka Super Division, ka Mukhla Raij Sports Club ka la lah ban pynliem noh ïa ka Shangpung Lumiawmushai Sports Club da 2-0 kol. Ïa kine ki kol la thep da u Teddy Bang ha ka minit kaba 47 bad u Lambor Lyngdoh ha ka minit kaba 90.
Kum ban shu pynkynmaw ba ka Mukhla Raij ha ka jingïakhun kaba nyngkong ka la pynïakhaid ïa ka jingïakhun da mar 1-1 kol ha ka jingïakhun pyrshah ïa ka 7 Wasa United, katba ka Shangpung Lumiawmushai ha ka jingïakhun kaba nyngkong ka la lah ban pynliem noh ïa ka Khimusniang da 3-2 kol.
Ha ka 24 tarik mynta u bnai pat ka jingïakhun ha ka First Division kan long hapdeng ka Mukhla Evergreen Sports Club pyrshah ïa ka Sabahmuswang Sports Club ha ka por 12.00 baje mynsngi, katba ka jingïakhun ha ka Super Division kan long hapdeng ka 7 Wasa United pyrshah ïa ka Khimusniang Sports Club ha ka por 2 baje nohphai sngi.
