Shillong, Risaw 23
Ka Air Marshal Sadhna Saxena Nair ha ka Lah Sngi U Blei ka la shimti kum ka Director General Hospital Services (Armed Forces) hadien ka jingkiew kyrdan kum ka Air Marshal.
Hashuwa, ka la bat kum ka Principal Medical Officer ha Training Command jong ka Indian Air Force (IAF) kaba ha Bangalore.
Ka Air Marshal Nair ka dei ka ophisar kynthei kaba 2 kaba la shakri ha ka tnad shipai liengsuiñ ka ban kiew kyrdan kum ka Air Marshal; ka kynthei kaba nyngkong ka ban kynjoh ïa kane ka long ka Air Marshal Padma Bandopadhyay (Retd).
Ka Air Marshal Nair ka dei ka kurim jong u Air Marshal KP Nair (Retd).
Ha kajuh ka por, ki Nair ki long ruh ki shijur ba nyngkong kiba la kot sha ka kyrdan Air Marshal ha ka IAF.
Ka dei ruh ka khun bad kaba shipara jong ki doktor ha ka tnad IAF bad ka kurim, kumjuh ka kmie jong ki ‘pilot’ nongïakhun ka tnad shipai liengsuiñ.
Kumba ka long, 3 pateng jong ki bahaïing jong ka ki la shakri ha ka tnad IAF ha kine ki 70 snem ba la leit.
Ka la pyndep ïa ka jingpule ‘Graduate’ na ka Armed Forces Medical College, Pune bad ka la rung kam sha ka IAF ha u Nohprah, 1985.
Ka la pyndep ruh ïa ka ‘Post Graduate Degree’ ha ka tnad pule Family Medicine bad ïa ka jingshah hikai ba 2 snem ha ka tnad pule Medical Informatics ha AIIMS, New Delhi.
Shuh shuh ka la pyndep ïa ka jingshah hikai shabar ha ka CBRN Warfare bad Military Medical Ethics. Ka long ruh ka kynthei banyngkong eh kum ka Principal Medical Officer jong ka Western Air Command bad Training Command.
Nalor kane, ka la ïoh pdiang ïa ka ‘Vishisht Seva Medal’ na ka President ka India, lem bad ka khusnam CAS bad AOC-in-C.
